సాయిభక్తుల అనుభవమాలిక 2082వ భాగం....

---

ఈ భాగంలో అనుభవాలు:

1. పిలవగానే సహాయం చేస్తారు బాబా

2. బాబా కరుణ ఎంతో  గొప్పది

---

పిలవగానే సహాయం చేస్తారు బాబా

సాయిభక్తులందరికీ నమస్కారాలు. నా పేరు నవ్య. 2025, ఆగస్టు నెలలో మేము వరంగల్‌లో గృహప్రవేశం చేసాము. అక్కడ నేను, నా భర్త, మా పాప 10 రోజులు ఉండి కార్యక్రమం అయిపోయాక తిరిగి హైదరాబాద్ వచ్చాం. అప్పటినుండి మాకు ఒక సమస్య మొదలైంది. యూకేజీ చదువుతన్న మా పాప 10 రోజులు స్కూలుకి వెళ్లని కారణంగా మారం చేసి, ఏడ్చి స్కూలుకి వెళ్లలేదు. 2, 3 రోజుల తర్వాత వెళ్ళమంటే, మళ్ళీ ఏడ్చి చాలా సతాయించింది. బలవంతంగా స్కూలుకి తీసుకెళ్లినా క్లాసుకి వెళ్ళేది కాదు. అంతకుముందు కూడా ఏదైనా అవసరం వల్ల స్కూలుకి వెళ్లకుండా ఉంటే, ఇలాగే ఏడ్చేది. కానీ ఒకటి, రెండు రోజులలో సర్దుకునేది. ఈసారి మాత్రం అలా జరగలేదు. ఎప్పుడూ ఇంతలా ఏడవలేదు. మాకు చాలా భయం వేసింది. వారం, 10 రోజులైనా అదే పరిస్థితి. అసలు ఏమైందో తెలియదు. పాప ప్రతిరోజూ భయపడేది, ఏడ్చేది. బలవంతంగా స్కూలుకి తీసుకెళ్లిన పాపని టీచర్లు, ఆయావాళ్ళు పట్టుకుని తీసుకెళ్తుంటే చూసినా మాకు కూడా ఏడుపు వచ్చేది. నిజానికి మా పాప చదువులో ఫస్ట్. స్కూలుకి వెళ్లకుండా ఉండటం, హోంవర్క్ చేయకుండా ఉండటం వంటివి ఉండేవి కావు. అలాంటి పాప ఇప్పుడు 15 రోజులైనా స్కూలుకి వెళ్లకుండా ఉండిపోయింది. ఇంకా అప్పుడు నేను బాబాని వేడుకున్నాను. ఆయన దయవల్ల కొద్దిరోజులకు అంతా సర్దుకుంది. నిజంగా సాయి పిలవగానే వచ్చి సహాయం చేస్తారు. "ధన్యవాదాలు బాబా. ఇలాగే ఎప్పుడూ కాపాడు తండ్రీ".

---

బాబా కరుణ ఎంతో  గొప్పది

నా పేరు మహేశ్వర. నేను చాలా సంవత్సరాలుగా కాళ్లనొప్పితో బాధపడుతున్నాను. ఆ నొప్పి కారణంగా నేను నా దైనందిన జీవితంలో పనులు సరిగా చేయలేకపోతుండేవాడిని. ఎన్ని మందులు వాడినా తాత్కాలిక ఉపశమనం తప్ప పూర్తి ఉపశనం రాలేదు. ఇంకా అప్పుడు నేను శ్రీ శిరిడీ సాయిబాబాని ఆశ్రయించి ప్రతిరోజు సాయి నామస్మరణ చేయనారంభించి నా బాధను వారి పాదాల వద్ద సమర్పించాను. కొద్దిరోజుల్లో నొప్పి క్రమంగా తగ్గడం ప్రారంభమై పూర్తిగా తగ్గిపోయింది. మొదటిసారి ఆ నొప్పి నుండి నాకు లభించిన అద్భుతమైన ఉపశమనం అది. బాబా కృపతో నేను మళ్లీ సాధారణ జీవితం గడపగలిగాను. అయితే కొన్ని నెలల తరువాత ఆ నొప్పి మళ్ళీ వచ్చింది. ఈసారి నేను భయపడకుండా బాబాను ప్రార్థించి, ఆయన ఊదీ విశ్వాసంతో ధరించాను. ఆశ్చర్యంగా రెండోసారి కూడా నొప్పి నెమ్మదిగా తగ్గుతూ పూర్తిగా ఉపశమనం లభించింది. ఈ రెండు సందర్భాల్లోనూ నేను బాబా దయను స్పష్టంగా అనుభవించాను. నా విశ్వాసం మరింత బలపడింది. కష్టకాలంలో సాయిబాబా నామస్మరణే నాకు బలంగా నిలిచింది. ఇప్పుడు నేను ఆరోగ్యంగా ఉన్నాను. ఈ అనుభవం ద్వారా బాబా ఎల్లప్పుడూ తన భక్తులను కాపాడుతారని గట్టి నమ్మకాన్నిచ్చింది.

2026, మార్చి 7, ఉదయం నేను నా కళ్లజోడు ఎక్కడో పెట్టి మర్చిపోయాను. ఇంట్లో టేబుల్ మీద, బ్యాగులో, గదిలో అన్ని చోట్లా ఎంత వెతికినా అది కనిపించలేదు. కళ్లజోడు లేకుండా నాకు ఏ పని సరిగ్గా నడవదు, చాలా కష్టం. అందుకని కొంచెం ఆందోళనగా అనిపించింది. అప్పుడు మనసులో, "బాబా! నా కళ్లజోడు ఎక్కడ ఉందో చూపించండి. మీ కృపతో అది దొరకాలి" అని బాబాను ప్రార్థించాను. కొద్దిసేపటి తర్వాత మరోసారి వెతకాలనిపించి వెతికితే, ఆశ్చర్యం! నేను అంతకుముందు చూసిన చోటే కళ్లజోడు కనిపించింది. ఆ క్షణం నా మనసు చాలా ఆనందంతో నిండిపోయింది. వెంటనే “ధన్యవాదాలు బాబా” అని కృతజ్ఞతతో నమస్కరించాను.

2026, మార్చి 23న మా ఇంట్లోని వాషింగ్ మెషిన్ ఆన్ కాలేదు. ఒకటి, రెండుసార్లు ప్రయత్నించినా పని చేయలేదు. ఏమైందో అర్థంకాక కొంచెం టెన్షన్‌గా అనిపించి మనసులో బాబాను, “ఇది సాఫీగా పని చేసేలా చూడండి బాబా” అని కోరుకున్నాను. తర్వాత ప్రయత్నిస్తే, ఆశ్చర్యంగా మెషిన్ ఆన్ అయింది. అది చూసి నాకు చాలా ఆనందమేసింది. చిన్న విషయమైనా బాబా కరుణ ఎంత గొప్పదో అనిపించింది.

2026, మార్చి 30, ఉదయం నుంచి నా కడుపులో చాలా నొప్పి మొదలైంది. అది సాధారణంగా వచ్చే నొప్పి కాదనిపించింది. నేను పని మీద దృష్టి పెట్టలేకపోయాను, చాలా అసౌకర్యంగా అనిపించింది. ఆ సమయంలో నాకు బాబా గుర్తొచ్చి మనస్ఫూర్తిగా, "బాబా! త్వరగా ఈ నొప్పిని తగ్గించండి. నేను మీ మీద పూర్తి నమ్మకంతో ఉన్నాను" అని ప్రార్థించి కొన్ని నిమిషాలు కళ్ళు మూసుకుని బాబాను ధ్యానించాను. అద్భుతం! కేవలం 10 నిమిషాల్లో నొప్పి తగ్గడం ప్రారంభమై కొద్దిసేపటికి పూర్తిగా మాయం అయింది. ఇది సాధారణ విషయం కాదని నాకు స్పష్టంగా అనిపించింది. బాబా కరుణ వల్లే ఇలా జరిగిందని నా హృదయం చెబుతోంది. మనం నిజమైన భక్తితో, నమ్మకంతో ప్రార్థిస్తే బాబా ఎప్పుడూ మనకు సహాయం చేస్తారు. ఆయన ఎప్పుడూ మనతోనే ఉంటారు, మన సమస్యలను పరిష్కరిస్తారు. ఈ అనుభవాల ద్వారా సమస్యలు ఎంత చిన్నవైనా బాబాకు చెప్పాలని, ఆయన ఆశీస్సులు లేకుండా ఏదీ జరగదనిపించింది. "ధన్యవాదాలు బాబా. మీ ఆశీస్సులు ఎప్పటికీ మా మీద ఉండాలని కోరుకుంటున్నాను తండ్రీ".

---