సాయిభక్తుల అనుభవమాలిక 2066వ భాగం....

---

ఈ భాగంలో అనుభవం:

• ఎప్పుడూ మనతో ఉండే బాబా కరుణ

---

నా పేరు మహేశ్వర. నేను కొద్ది రోజులు తీవ్రమైన పళ్ళ నొప్పితో బాధపడ్డాను. ఆ కారణంగా తినడం, మాట్లాడడం నాకు కష్టంగా మారింది. మందులు తీసుకున్నా నొప్పి పూర్తిగా తగ్గలేదు. అప్పుడు నేను, “బాబా! ఈ నొప్పి నుంచి నాకు ఉపశమనం ప్రసాదించండి” అని మనస్ఫూర్తిగా బాబాను ప్రార్థించి ఆయన మీద నమ్మకముంచాను. అలా ప్రార్థించినంతనే నా మనసుకి ప్రశాంతంగా అనిపించింది. ఆ రాత్రి నొప్పి తీవ్రత క్రమంగా తగ్గడం మొదలై మర్నాడు ఉదయం నిద్రలేచేసరికి చాలావరకు తగ్గిపోయింది. నాకు నిజంగా ఆశ్చర్యమనిపించింది. సాయిబాబా ఆశీర్వాదాలే అందుకు కారణమని నా హృదయపూర్వక విశ్వాసం. ఈ అనుభవం నా విశ్వాసాన్ని బలపరిచింది. భక్తి మనసుకు శక్తినిస్తుందని, మనసు ప్రశాంతంగా ఉంటే శారీరక ఉపశమనం వస్తుందని అర్థమైంది. కష్ట సమయంలో సాయిబాబా మీద నమ్మకం చాలా ఆవశ్యకం. బాబా కరుణ ఎప్పుడూ మనతో ఉంటుంది. నమ్మకంతో బాబాని ప్రార్థించండి. ఆ సాయిబాబా అందరికీ ఆరోగ్యం, శాంతి ఇవ్వాలని కోరుకుంటున్నాను.

ఒకరోజు నేను ఇంటికి తాళం వేసి టిఫిన్‌ కోసం బయటికి వెళ్ళాను. టిఫిన్ చేసి తిరిగి వచ్చాక చూస్తే, తాళం చెవి కనిపించలేదు. నాకు చాలా ఆందోళనగా అనిపించి నా బ్యాగులో, జేబులో, బైక్ దగ్గర అంతా వెతికాను. కానీ తాళం చెవి దొరకలేదు. మనసులో భయం పెరిగి సాయిబాబాను తలుచుకొని, “బాబా! మీరే తాళం చెవి దొరికే మార్గం చూపించండి” అని మనస్ఫూర్తిగా ప్రార్థించి ఆయన మీద పూర్తి నమ్మకంతో కాసేపు ప్రశాంతంగా నిల్చున్నాను. అప్పుడు ఒక ఆలోచన నా మనసులోకి వచ్చింది. టిఫిన్‌కు వెళ్లేముందు చెప్పుల స్టాండ్ నుండి చెప్పులు తీసిన సంగతి గుర్తొచ్చి, అక్కడ చూడాలనిపించింది. వెంటనే చెప్పుల స్టాండ్ దగ్గరకు వెళ్లి చూస్తే, తాళం చెవి ఆ చెప్పుల స్టాండ్‌లోనే ఉంది. ఆ క్షణం నాకు ఎంతో ఆనందం కలిగింది. బాబా కృప వలనే ఇది జరిగిందని అనుకున్నాను. చిన్న విషయమే అయినా బాబా ఎంత జాగ్రత్త వహించారో అర్థమై మనసంతా కృతజ్ఞతతో నిండిపోయింది. బాబాపై నమ్మకం ఎన్నడూ వృధా కాదని మరోసారి తెలిసింది. సాయిబాబాకు నా హృదయపూర్వక ధన్యవాదాలు.

నేను హైదరాబాద్‌లో ఐటీ ఉద్యోగం చేస్తున్నాను. 2026, సంక్రాంతి పండగకి నేను హైదరాబాద్ నుంచి నెల్లూరుకు సమీపంలో ఉన్న నా స్వగ్రామానికి వెళ్లాలనుకున్నాను. అయితే పండగకి ముందు వర్ష సూచనలు ఉండటంతో నాకు కొంత ఆందోళన కలిగింది. నెల్లూరు వరకు ఏ ఇబ్బందీ లేకుండా చేరుకున్నాక అక్కడ వాతావరణం మేఘావృతంగా కనిపించింది. దాంతో వర్షమొస్తే తదుపరి నా ప్రయాణానికి ఇబ్బందిగా ఉంటుందేమోనన్న భయం కలిగి, “బాబా! నేను సురక్షితంగా నా స్వగ్రామానికి చేరేవరకు వర్షం లేకుండా కాపాడు” అని సాయిబాబాను మనస్ఫూర్తిగా ప్రార్థించాను. ఆ తరువాత మనసుకి కొంత ధైర్యం, ప్రశాంతత కలిగాయి. నేను నెల్లూరు నుంచి ప్రయాణం ప్రారంభించినప్పుడు ఆకాశం మబ్బులతో ఉన్నప్పటికీ బాబాపై నమ్మకంతో ముందుకు సాగాను. నేను స్వగ్రామానికి చేరేవరకు ఒక్క చుక్క వర్షం కూడా పడలేదు. ఇది పూర్తిగా బాబా అనుగ్రహమేనని హృదయపూర్వకంగా అనిపించింది. కొద్దిసేపటికే తేలికపాటి వర్షం మొదలైంది. అది చూసి బాబా నా ప్రార్థనను ఆలకించారనిపించింది. బాబా దయవల్ల భోగి పండుగ ఏర్పాట్లు ఎలాంటి అంతరాయం లేకుండా జరిగాయి.

మర్నాడు నా జీవితంలో మరో ముఖ్యమైన అనుభవం చోటు చేసుకుంది. అదేమిటంటే, మా టీమ్‌కి సెక్యూరిటీ ఆపరేషన్స్ హెడ్‌తో టీమ్ మీటింగ్ షెడ్యూల్ అయింది. నాకు కొంచెం టెన్షన్ అనిపించింది. చర్చ కీలకమైనందున మనసులో ఒత్తిడి పెరిగి మీటింగ్‌ జరగడానికి ముందు నేను సాయిబాబాను, “బాబా! నాకు ధైర్యం ఇవ్వండి. మీటింగ్ సజావుగా జరిగేలా చూడండి” అని ప్రార్థించాను. అప్పుడు నా మనసుకి కొంత ప్రశాంతంగా అనిపించింది. మీటింగ్ ప్రారంభమయ్యాక సెక్యూరిటీ ఆపరేషన్స్ హెడ్ కీలక ప్రశ్నలు అడిగారు. వాటికి మా టీమ్ ధైర్యంగా స్పష్టమైన సమాధానాలు ఇచ్చింది. నేను కూడా ఆత్మవిశ్వాసంతో నా అభిప్రాయాలు వ్యక్తపరిచాను. మీటింగ్ మొత్తం సాఫీగా సాగింది. ఏ సమయంలోనూ ఒత్తిడి, గందరగోళం అనిపించలేదు. చివరికి సెక్యూరిటీ ఆపరేషన్స్ హెడ్ మా పనిపై సంతృప్తి వ్యక్తం చేశారు. అది విని నా టెన్షన్ పూర్తిగా తగ్గిపోయింది. ఈ విజయానికి సాయిబాబా ఆశీర్వాదమే కారణమనిపించింది. ప్రార్థన మనసుకు ధైర్యం, స్థిరత్వం ఇస్తుందని ఈ రెండు అనుభవాలు నాకు బలంగా తెలియజేశాయి. కష్ట సమయంలో బాబాను నమ్ముకుంటే అంతా తేలికవుతుందని నమ్మకం మరింత పెరిగింది. సాయిబాబా అనుగ్రహం ఎల్లప్పుడూ తన భక్తులతోనే ఉంటుందనే విశ్వాసంతో ఈ అనుభవాలు మీతో పంచుకున్నాను.

---