సాయిభక్తుల అనుభవమాలిక 2107వ భాగం....

---

ఈ భాగంలో అనుభవాలు:

1. శ్రద్ధ-సబూరిలతో బాబాని ప్రార్థిస్తే, ఆయన తప్పకుండా సహాయం చేస్తారు

2. బదిలీ కాకుండా దయచూపిన బాబా

---

శ్రద్ధ-సబూరిలతో బాబాని ప్రార్థిస్తే, ఆయన తప్పకుండా సహాయం చేస్తారు

సాయి బంధువులందరికీ నా నమస్కారాలు.  నా పేరు చైతన్య. మేము హైదరాబాదులో ఉంటాము. మేము శ్రీరామనవమికి మా అత్తయ్యవాళ్ళ ఊరిలో శ్రీసీతారాముల కళ్యాణం చేద్దామని అనుకున్నాము. కానీ ఆ గుడికి కమిటీ వంటిది ఏమీ లేనందున ఎవరు కళ్యాణం చేయించాలనుకుంటే వాళ్లే దగ్గరండి అన్ని ఏర్పాట్లు చేసుకోవాలి. ఊరిలో ఉన్న మా అత్తయ్య, మావయ్యలు వయసురీత్యా ఏ పని చేయలేరు. కాబట్టి మేము ఇక్కడినుండి పది రోజుల ముందు అక్కడికి వెళ్లి అన్ని చూసుకోవాలి. కానీ, 'అన్ని పనులు చూసుకోగలమా?' అని మాకు కొంచెం భయమేసింది. రామయ్య మీద భారమేసి "అంతా సవ్యంగా ఈ ఆటంకాలు లేకుండా జరిగేలా చూడమ"ని రామయ్యని, బాబాని ప్రార్థించి పనులు ప్రారంభించాం. ఆ క్రమంలో చిన్న చిన్న ఆటంకాలు చాలా వచ్చాయి. ఆ సమయంలో గ్యాస్ కొరత ఏర్పడి వంటకి కావలసిన సిలిండర్లు దొరకడం కష్టమైంది. ఏదైనా సమస్య వచ్చినప్పుడు మనకు గుర్తుకు వచ్చే దైవం బాబానే కనక ఆయన్నే, "ఎలాగైనా మీరే ఏర్పాటు చేయాలి" అని ప్రార్థించాను. సాయి రాముడు దయవల్ల వల్ల తెలిసినవాళ్ళు సిలిండర్లు ఏర్పాటు చేశారు. శ్రీరామనవమి మర్నాడు అనగా ముందురోజు రాత్రి అన్నదానం కోసం ఏర్పాట్లు చేస్తుండగా హఠాత్తుగా వంట చేసే అతనికి కడుపునొప్పి వచ్చి హాస్పిటల్లో జాయిన్ అయ్యాడు. దాంతో పనులు ఆగిపోయాయి. అప్పుడు చాలా భయపడ్డాము. "ఇదేంటి బాబా? అతిధుల అందర్నీ భోజనానికి పిలిచాము, ఇప్పుడు చూస్తే, వంట మాస్టర్‌కి ఇలా అయింది. ఇప్పుడు ఎలా రేపటికోసం భోజన ఏర్పాట్లు చేయాలి?" అని చాలా ఆందోళన చెందాము. సమయం ఉంటే ఇంకొక వంటచేసే అతన్ని ఏర్పాటు చేసుకోవచ్చు కానీ, అంత సమయం లేదు. అది చాలా పల్లెటూరు. అప్పటికప్పుడు వేరే వంట మాస్టర్ దొరికే అవకాశం లేదు. క్యాటరింగ్‌కి ఇవ్వడానికి కూడా సమయం లేదు. మర్నాడు శ్రీరామనవమికి వచ్చే అతిధులకు ఉదయం టిఫిన్, మధ్యాహ్నం భోజనం తయారు చేయాలి. ఆ స్థితిలో, "బాబా! ఎలాగైనా ఏ ఇబ్బంది లేకుండా వచ్చే అతిధులకి భోజన ఏర్పాట్లు జరిగేలా ఒక వంట మాస్టర్‌ని మీరే పంపించండి" అని ప్రార్థించాను. బాబా దయవల్ల ఒకతను వచ్చి మంచిగా అతిథులకు కావాల్సిన టిఫిన్లు, భోజనాలు ఏర్పాటు చేశాడు. మేము అనుకున్న దానికంటే కళ్యాణం బాగా జరిగింది. అందరూ కళ్యాణం తిలకించి, భోజన ఏర్పాట్లు బాగున్నాయని అన్నారు. ఇదంతా బాబా అనుగ్రహమే. కొంచెం కష్టం వచ్చినప్పుడు ఓపికతో ఉండి భగవంతుని ప్రార్థిస్తే, తప్పకుండా సహాయం చేస్తారు.

2026లో మా బాబు బీటెక్ నాలుగో సంవత్సరంలో ఉండగా తన కాలేజీలో క్యాంపస్ ప్లేస్మెంట్స్ జరిగాయి. మొదట వ్రాత పరీక్ష పెడితే, మా బాబు పరీక్ష బాగానే వ్రాసి నెక్స్ట్ లెవెల్ ఎగ్జామ్‌కి సెలెక్ట్ అయ్యాడు. అది కూడా బాగా వ్రాసిన వాళ్లకి హెచ్ఆర్ ఇంటర్వ్యూ ఉండగా మా బాబుతోపాటు వ్రాసిన తన ఫ్రెండ్స్ అందరికీ హెచ్ఆర్ ఇంటర్వ్యూ జరిగి, అందులో సెలెక్ట్ అయిన కొంతమందికి ఫైనల్ హెచ్ఆర్ ఇంటర్వ్యూ కూడా జరుగుతున్నా మా బాబుని పిలవలేదు. దాంతో తను చాలా టెన్షన్ పడ్డాడు. అప్పుడు నేను తనతో, "ఏమీ పరవాలేదు. నిన్ను కూడా పిలుస్తారు. శ్రీసాయి సచ్చరిత్ర చదివి బాబా మీద నమ్మకంతో బాబాను ప్రార్థించు" అని ధైర్యం చెప్పాను. తను సరేనని, సచ్చరిత్ర పారాయణ చేస్తుంటే, బాబా దయవల్ల తనకి హెచ్ఆర్ ఇంటర్వ్యూ ఉందని మెయిల్ వచ్చింది. అప్పుడు కూడా తను సెలెక్ట్ అవుతానో, లేదో అని చాలా టెన్షన్ పడ్డాడు. ఎందుకంటే, ఈ సంవత్సరం అంతకు ముందులా స్టూడెంట్స్‌ని కంపెనీవాళ్ళు తీసుకోవడం లేదు. నేను. "బాబా మీద నమ్మకంతో ఇంటర్వ్యూ అటెండ్ చేయి. నువ్వు తప్పక విజయం సాధిస్తావ"ని మా బాబుతో చెప్పాను. తను బాబా మీద నమ్మకముంచి ఇంటర్వ్యూకి వెళ్ళాడు. బాబా దయవల్ల ఇంటర్వ్యూలో తను బాగా ఆన్సర్ చేసి సెలెక్ట్ అయ్యాడు. ఇది బాబా లీల. ఎందుకు ఇలా అంటున్నానంటే, మా బాబు ఫ్రెండ్స్ కొంతమందికి మంచి మార్కులు  వచ్చి కూడా ఇంటర్వ్యూలో సెలెక్ట్ కాలేదు, వాళ్ళకి జాబ్ రాలేదు. ప్రస్తుత పరిస్థితుల్లో ఉద్యోగం రావడం చాలా కష్టంగా ఉంది. మా బాబు స్నేహితులకు కూడా మంచి ఉద్యోగాలు రావాలని నేను బాబాని వేడుకుంటున్నాను. మా బాబుకి జాయినింగ్ లెటర్ ఇంకా ఇవ్వలేదు. అది ఎప్పుడు వస్తుందో అని ఎదురు చూస్తున్నాడు. నేను తనకి జాయినింగ్ లెటర్ వచ్చి, తను ఉద్యోగంలో స్థిరపడాలని బాబాని ప్రార్థిస్తున్నాను. మనం శ్రద్ధ-సబూరిలతో బాబాని ప్రార్థిస్తే, ఆయన తప్పకుండా సహాయం చేస్తారు. 

మా చిన్నబాబు ఏ పనిచేసినా సాయినాథుని ప్రార్థించి ముండదు వేస్తాడు. తను ఈ సంవత్సరం(2026) పదవ తరగతి పరీక్షలు వ్రాసాడు. బాబా దయవల్ల తనకి చాలా మంచి మార్కులు వచ్చాయి. తన అనుకున్న దానికంటే మంచి పర్సంటేజ్ వచ్చింది. "బాబా! ఇలాగే తన విద్యాభ్యాసం మంచిగా సాగేలా సహాయం చేయండి. మీ కృప అందరి మీద ఉండేలా అనుగ్రహించండి. ఎల్లప్పుడూ మేము మీ నామస్మరణలో ఉండేలా దీవించండి".

---

బదిలీ కాకుండా దయచూపిన బాబా

నేను ఒక సాయి భక్తుడిని. మేము సోలాపూర్‌లో ఉంటాము. ఇక్కడ నేను రైల్వేలో, నా భార్య LICHFLలో పని చేస్తున్నాం. గత ఆరు సంవత్సరాలుగా ఇక్కడే ఉంటున్నందున ఒక ఇల్లు తీసుకుంటే బాగుంటుందని నిర్మాణంలో ఉన్న ఒక ఇల్లు తీసుకున్నాం. ఇంకా ఇంటికి ఫర్నిచర్, గృహప్రవేశం చేయాల్సి ఉండగా అనుకోకుండా నా భార్యకి ప్రమోషన్‌తో పాటు బదిలీ అయ్యే అవకాశం ఉందని ఆఫీసులో చెప్పారు. కొత్తగా తీసుకున్న ఇంట్లో అడుగుపెట్టకుండానే ఊరి వదిలి వెళ్ళిపోవడం ఏంటని అనిపించి బాబాని, "వేరే చోటుకి బదిలీ వస్తే, నచ్చిన ఉద్యోగం మానేయాల్సి ఉంటుంది. ఒక్కరి జీతంతో ఇల్లు గడవడం కష్టం. ఇద్దరు పిల్లలతో చాలా కష్టం అవుతుంది. ఎలా అయినా బదిలీ కాకుండా ఉండి అందరం కలిసి కొత్త ఇంట్లో అడుగుపెట్టేలా చూడండి. ఐదుగురుకి అన్నదానం చేసి, మీ మందిరంలో కొబ్బరికాయ సమర్పించుకుంటాను" అని వేడుకున్నాను. బాబా దయవల్ల ఈ సంవత్సరం బదిలీ రాలేదు. వస్తాదనుకున్న ప్రమోషన్ కూడా రాకపోయినా బాబా ఏం చేసినా మన క్షేమం కోసమే చేస్తారని అనుకున్నాం. "చాలా ధన్యవాదాలు బాబా. ఇంటి పని తొందరగా పూర్తై గృహప్రవేశం చక్కగా జరిగేలా చూడండి".

---