సాయి వచనం:-

- శ్రీబాబూజీ.

సాయిభక్తుల అనుభవమాలిక 2093వ భాగం....

3 comments:
ఈ భాగంలో అనుభవాలు:

1. ఏళ్ళ బాధను ఒక్క ప్రార్థనతో తీసేసిన బాబా
2. కోరుకున్నట్టే బిడ్డలను ప్రసాదించిన బాబా
కోరుకున్నట్టే బిడ్డలను ప్రసాదించిన బాబా

నేను ఒక బాబా భక్తురాలిని. బాబా ఎప్పుడూ నాతోనే ఉంటారనడానికి నాకు చాలా అనుభవాలున్నాయి. నేను ఎప్పుడూ ఆయనకి కృతజ్ఞతతో ఉంటాను. నాకు పెళ్ళైన తర్వాత నేను ఎప్పుడూ నాకు మొదట పాపే పుట్టాలని అనుకునేదాన్ని. బాబా అలాగే నాకు మొదట పాపని ప్రసాదించారు. నేను చాలా సంతోషించాను. తరువాత నా భర్త రెండో బిడ్డ కావాలని చాలాసార్లు అన్నప్పుడు నాకు చాలా భయమేసింది. ఎందుకంటే, మళ్ళీ ఎక్కడ పాప పుడుతుందో అని. నాకు, నా భర్తకి ఎవరైనా 'ఓకే' కానీ, మా ఇంట్లోవాళ్ళకి మాత్రం బాబే పుట్టాలని కోరిక. అదీకాక మా ఆర్థిక పరిస్థితి దృష్ట్యా కూడా నాకు భయంగా ఉండేది. అందుకే నా భర్త ఎప్పుడు రెండో బిడ్డ గురించి అన్నా నేను 'వద్దు' అనేదాన్ని. ఇంట్లో పెద్దవాళ్లు కూడా మళ్ళీ ఎక్కడ పాప పుడుతుందోనని "రెండో బిడ్డ వద్దు" అనేవారు, మళ్ళీ "మీ ఇష్టం" అని కూడా అనేవారు. నాకు ఏమీ అర్థం అయ్యేది కాదు. అలా కొన్నిరోజులు గడిచాక బాబా దయవల్ల నా భర్తకు విదేశాలకు వెళ్లే అవకాశం రావడంతో మేము ఆర్థికంగా కొంచం స్థిరపడ్డాం. ఆ తర్వాత నా భర్త రెండో బిడ్డ విషయంగా "ఇప్పుడు ఏం ఇబ్బంది లేదు కదా!" అంటే, నేను ;సరేన'న్నాను. కొంచం ఎక్కడో భయంగా ఉండేది గానీ బాబా మీద నాకు పూర్తి విశ్వాసం ఉండేది. ఆయన నా కోరిక తీర్చారు. మాకు బాబు పుట్టాడు. బాబా దయవల్ల మేము ఇప్పుడు చాలా సంతోషంగా ఉన్నాము. "ధన్యవాదాలు బాబా. మీ కృప ఎప్పుడూ మాపై ఇలానే ఉండాలి తండ్రీ. ఎప్పుడూ మాతో ఉండి మమ్మల్ని మంచి దారిలో నడిపించండి".
Read More

సాయిభక్తుల అనుభవమాలిక 2092వ భాగం....

9 comments:
ఈ భాగంలో అనుభవం:

  • సమస్యలు చిన్నవైనా, పెద్దవైనా బాబాను నమ్మి ప్రార్థిస్తే, మనసుకు ప్రశాంతత లభిస్తుంది
Read More

సాయిభక్తుల అనుభవమాలిక 2091వ భాగం....

10 comments:
ఈ భాగంలో అనుభవాలు:

1. సాయి ఇచ్చిన దర్శనాలు - నిదర్శనాలు
2. ఏ కష్టం వచ్చినా సాయితండ్రే రక్ష
ఏ కష్టం వచ్చినా సాయితండ్రే రక్ష

సాయిబంధువులందరికీ నమస్కారాలు. నా పేరు సాహితి. 2025, జూలైలో నాకు విపరీతమైన ఒళ్ళునొప్పులతో జ్వరం వచ్చి లేచి, నడవడం చాలా కష్టమైంది. డాక్టర్ దగ్గరకి వెళితే చాలా రోజులకి జ్వరం తగ్గింది కానీ, కాళ్ల వాపులు, నొప్పులు తగ్గలేదు. బాబాను ప్రార్థిస్తూ ఇద్దరు డాక్టర్లని సంప్రదించినా తగ్గలేదు. నాకు నడవడం చాలా కష్టంగా ఉండేది. సమయానికి బాబా దయవల్ల వేరే ఊరిలో ఉద్యోగాలు చేసుకుంటున్న మా పిల్లలిద్దరికీ ఇంటి నుండి పని చేసే అవకాశం ఇవ్వడంతో వాళ్ళు ఇంటికి వచ్చారు. ఆవిధంగా బాబా నాకు ధైర్యాన్నిచ్చారు. కానీ రోజులు గడుస్తున్నా కాళ్లనొప్పులు తగ్గకపోవడంతో నేను చాలా భయపడి బాబాను ప్రార్ధించి హోమియో వైద్యుడి దగ్గరకి వెళ్తే, టెస్టులు చేయించుకోమని చెప్పారు. అసలే షుగర్ వ్యాధిగ్రస్థురాలినైన నేను ఏ కిడ్నీ సమస్యో అని చాలా భయపడి, "సాయీ! టెస్టులు చేయించుకుంటాను. ఏ సమస్య లేకుండా రిపోర్టులన్నీ నార్మల్‌‌‌గా వచ్చేలా చేయండి" అని బాబాను వేడుకున్నాను. బాబా కరుణించారు. టెస్టులు చేయించుకున్నాక ఎటువంటి నెగిటివ్ రిపోర్ట్ లేకుండా అన్నీ నార్మల్‌‌‌గా వచ్చాయి. హోమియో వైద్యుడు టాబ్లెట్లు ఇచ్చారు. వాటితో కాళ్లు నొప్పులు, వాపులు తగ్గాయి.

ఈమధ్య నా భర్త ఆరోగ్యం బాగాలేదు. ఆయన, "కాళ్ళు, చేతులు పట్టుతప్పుతున్నాయి. డ్యూటీ చేయడం కష్టంగా ఉంటుంద"ని అన్నారు. నేను బాబాని, "సాయీ! ఆయన ఆరోగ్యం మీ చేతిలోనే ఉంది తండ్రీ. ఆయన కూడా టెస్టులు చేయించుకుంటారు. అన్ని నార్మల్‌‌‌గా ఉండేటట్లు చేయండి" అని వేడుకున్నాను. ఆ సాయితండ్రి మా వెంటే ఉన్నందున ఒక్క షుగర్ రిపోర్టు ఎక్కువగా ఉందని రావడం తప్ప మిగతా టెస్టు రిపోర్టులు అన్నీ బాగానే వచ్చాయి. నాకు ఏ కష్టం వచ్చినా నా సాయితండ్రే నాకు రక్ష. "ప్రతి విషయంలో మాకు తోడుగా ఉంటున్న మీకు ధన్యవాదాలు సాయితండ్రి. నా భర్త షుగర్ అదుపులో ఉండేలా దయచూపండి".
Read More

సాయిభక్తుల అనుభవమాలిక 2090వ భాగం....

8 comments:
ఈ భాగంలో అనుభవాలు:

1. బాబా కృపతో వీసా ఆమోదం
2. కోరుకున్నట్లు అనుగ్రహించిన బాబా 
బాబా కృపతో వీసా ఆమోదం

సాయిభక్తులందరికీ నమస్కారం. నా తండ్రి సాయిబాబాకు పాదాభివందనాలు. నా పేరు శ్రీనివాసరావు. ఏమని చెప్పను నా తండ్రి నా జీవితంలో చేసిన అద్భుతాల గురించి? అధఃపాతాళంలో ఉన్న నాకు ఈ సమాజంలో గౌరవం కల్పించి, నా కుటుంబాన్ని ఎల్లపుడూ కాపాడుతూ ఉన్నారు నా తండ్రి బాబా. ఇప్పుడు నేను నా పెద్ద కుమారుని విషయంలో బాబా అనుగ్రహాన్ని పంచుకుంటున్నాను. నా పెద్ద కుమారుడి MS చదువు జర్మనీలో 2025, మార్చికి పూర్తైంది. తన వీసా 2026, మార్చి 18 వరకే ఉండటంతో ఆ లోపల తనకి ఉద్యోగం రాకపోతే తను ఇండియా తిరిగి వచ్చేయాలి. కాబట్టి తను చివరి సంవత్సరం చదువుతుండగానే ఉద్యోగాలకు దరఖాస్తు చేస్తుండేవాడు. అయితే ఇంటర్వ్యూలు చాలా బాగా జరిగినప్పటికీ ఏదో ఒక అడ్డంకి వచ్చి కాల్ లెటర్లు మాత్రం వచ్చేవి కావు. అందువల్ల నా కుమారుడు చాలా నిరాశకు గురవుతుండేవాడు. మేము బాబాను, "నా కుమారునికి జీవితాన్ని ప్రసాదించమ"ని వేడుకుంటూ ఉండేవాళ్ళం. అందుకు బాబా, "నేను ఉన్నాను. తప్పక సహాయం చేస్తాను. శ్రద్ధ-సబూరీతో ఉండమ"ని సందేశాలు ఇస్తూ ధైర్యం కలిగిస్తుండేవారు. మేము మా కుమారునితో "బాబాపై నమ్మకంతో ఉండమ"ని చెప్పేవాళ్ళం. బాబా దయవల్ల కొన్నిరోజులకి నా కుమారుడికి ఒక కంపెనీలో పార్ట్ టైమ్ ఉద్యోగిగా ఉద్యోగం వచ్చింది. ఆ కంపెనీవాళ్ళు నా కుమారుడి పనితనం చూసి కొత్త ప్రాజెక్టుకోసం ట్రైనింగ్ ఇచ్చారు. అలా 2026, ఫిబ్రవరి వరకు కాలం గడిచింది. అప్పుడు ఆ కంపెనీవాళ్ళు థర్డ్ పార్టీ ద్వారా నా కుమారుడి వీసా ఎక్స్టెన్షన్‍కి అప్లై చేశారు. మా అబ్బాయి వీసా ఇంటర్వ్యూకి అటెండ్ అయ్యాక 2026, ఏప్రిల్ 27 వరకు  ప్రొవిజినల్ వీసా ఇస్తూ, అప్రూవల్ కోసం పైఅధికారులకి పంపారు. మేము దాదాపు వీసా ఎక్స్టెన్షన్ అవుతుందని భావించి 2 సంవత్సరాల నుండి నా కుమారుడు ఇండియా రానందున ఒకసారి వచ్చి, వెళ్ళమని తనతో అన్నాము. తాను సరేనని మే 10వ తేదీకి  ఫ్లైట్ టికెట్ బుక్ చేసుకున్నాడు. కానీ అనుకోకుండా వీసా అప్లికేషన్ రిజెక్ట్ అయినట్లు నా కుమారునికి మెయిల్ వచ్చింది. దాంతో నా కుమారుడు, మేము చాలా ఆందోళనకు గురై ఇప్పుడు ఏం చేయాలని చాలా ఆలోచించాము. నేను, "ఏంటి బాబా ఇలా చేశారు? వీసా అప్రూవ్ అవుతుందనుకుంటే ఇలా చేసారేంటి? నిన్నే నమ్ముకున్న మమ్మల్ని ఆదుకోండి. మీ జీవితచరిత్ర(సచ్చరిత్ర) సప్తాహ పారాయణ చేస్తాను. దయచేసి ఎలాగైనా నా కుమారునికి వీసా వచ్చేటట్లు దారి చూపండి" అని కన్నీటితో ప్రార్ధించి 2026, ఏప్రిల్ 9న సప్తాహ పారాయణ మొదలుపెట్టాను(అప్పటికి 10, 15 రోజుల ముందునుంచి మా అబ్బాయి రోజూ బాబాకి పూజ చేసి, తనని ఆదుకోమని ప్రార్ధిస్తూ ఉండేవాడట). అదేరోజు బాబా చేసిన మిరాకిల్ చూడండి! ఆరోజు సాయంత్రం నా కుమారుడు ఫోన్ చేసి, 'ప్రస్తుతం తను పార్ట్ టైమ్ ఉద్యోగిగా పనిచేస్తున్న కంపెనీవాళ్ళు, జూన్ 8 నుండి తనని శాశ్వత ఉద్యోగిగా చేస్తున్నట్లు లెటర్ వీసా కార్యాలయానికి పంపారని, అలాగే వీసా ఎక్స్టెన్షన్‌కి కూడా రికమెండ్ చేస్తున్నట్లు లెటర్ పంపారని' చెప్పాడు. ఆ క్షణం మా అందరికీ ఎంతో ఆనందం కలిగింది. నేను నా తండ్రి సాయినాథునికి వేలవేల పాదాభివందనాలు తెలుపుకున్నాను. తర్వాత నా సప్తాహ పారాయణ చివరిరోజున పారాయణ ముంగించిన ఒక గంట తరువాత నా కుమారుడు "వీసా అప్రూవ్ అయింది నాన్న" అని నాకు మెసేజ్ పెట్టాడు. ఆ తండ్రికి ఎలా ధన్యవాదాలు చెప్పాలో నాకు అర్థం కావడం లేదు. మా జీవితాలు ఈ రోజు ఇంత ఆనందంగా ఉన్నాయంటే అది బాబా పెట్టిన భిక్షే. "ధన్యవాదాలు బాబా. తెలిసీతెలియక ఏమైనా తప్పులు చేసి ఉంటే నన్ను, నా కుటుంబాన్ని క్షమించండి బాబా. మేము మా జీవితాంతం మీ పాదాలకు శరణాగతి చెంది ఉండేలా ఆశీర్వదించండి బాబా".
Read More

సాయిభక్తుల అనుభవమాలిక 2089వ భాగం....

11 comments:
ఈ భాగంలో అనుభవం:

  • బాబా ప్రేమ - కోపం
Read More

సాయిభక్తుల అనుభవమాలిక 2088వ భాగం....

8 comments:
ఈ భాగంలో అనుభవాలు:

1. సాయికి దణ్ణం పెట్టుకున్న పది నిముషాల్లో దొరికిన డబ్బులు
2. బాబా కృప
3. బాబాని ప్రార్థించాక దొరికిన గొలుసు
సాయికి దణ్ణం పెట్టుకున్న పది నిముషాల్లో దొరికిన డబ్బులు

ఓం శ్రీసాయినాథాయ నమః. సాయి బంధువులందరికీ నమస్కారాలు. నేను ఒక సాయిభక్తుడిని. ఏ చిన్న విషయంలోనైనా నేను ఇబ్బందిపడితే, నాకు వెంటనే జ్ఞాపకం వచ్చేది సాయి నామం, సాయి రూపం మాత్రమే. మా ఇంటికి దగ్గరలో చిన్నపాటి నూకాలమ్మ గుడి ఉంది. ఆ గుడిని చూసుకొనేవాళ్ళ ఇంటిలోని వేరొకరు చనిపోవడం వలన ఏడాదిగా వాళ్ళు అమ్మవారి మంచి, చెడు చూసుకోలేకపోతుంటే నేను, మా ఇంటావిడ కలిసి ఆ గుడి బాధ్యతను స్వీకరించి మాకు తోచిన విధంగా మంచి, చెడు చూసుకున్నాము. ఆ బాధ్యతలో భాగంగా మేము అందరి ఆదరణతో అమ్మవారికి పుస్తెలతాడు, శతమానాలు చేయించాము. ఆ బాధ్యత పూర్తికాగానే అమ్మవారికి వెండి కాసులపేరు చేయిద్దామని నిర్ణయించుకొని భక్తుల నుండి చందాలు వసూలు చేస్తే 10,000 రూపాయలు వచ్చాయి. కానీ షాపువాళ్ళు 20,000 రూపాయలు అడిగారు. నేను సరేనని 5,000 అడ్వాన్స్ ఇచ్చి మిగిలిన 5,000 చిన్న పర్సులో ఉంచి, దాన్ని ఎక్కడో పెట్టి మర్చిపోయాను. ఎంత కాదనుకున్నా అవి అమ్మవారి సొమ్ము. కాబట్టి భుజాలు భుజాలు నొప్పి పుట్టేలా వారం రోజులు ఆ పర్సుకోసం ఇల్లంతా ఎంత గాలించినా అది దొరకలేదు. అలాంటి పరిస్థితిలో నాకు ఉన్న ఒకేఒక్క దిక్కు మన సాయినాథుడు. ఆయన్ని తలుచుకొని, "బాబా! దయచేసి ఆ పర్సు దొరికేటట్టు చేయండి. ప్లీజ్ బాబా. అవి అమ్మవారి సొమ్ము. నిన్ను వేడుకుంటే దొరుకుతాయనే నమ్మకం నాకుంది. పర్సు దొరికిన వెంటనే నీ సన్నిధికి వస్తాను. ఈ ఆనందం సాయిబంధువులందరికీ పంచుతాను" అని దణ్ణం పెట్టుకొని మళ్ళీ వెతికాను. పది నిమిషాల్లో ఆ పర్సు దొరికింది. వారం రోజులుగా దొరకనిది పది నిమిషాలు దొరకటం నిజంగా ఆశ్చర్యం. ఇది సాయి మహిమ కాక ఇంకేమిటి? మరుసటి శుక్రవారం సాయి దర్శనమునకు వెళ్లి నా ఆనందం మీతో ఇలా పంచుకున్నాను. సద్గురు సాయినాథ్ మహారాజ్ కీ జై. 
Read More

సాయిభక్తుల అనుభవమాలిక 2087వ భాగం....

, 10 comments:
ఈ భాగంలో అనుభవం:

  • కాన్పు సమయంలో, తర్వాత బాబా అనుగ్రహం

శ్రీ సచ్చిదానంద సద్గురు సాయినాథ్ మహారాజ్ కి జై!!! నేను ఒక సాయిభక్తురాలిని. బాబా ప్రతిక్షణం నా క్షేమాన్ని చూస్తుంటారన్న దానికి నిదర్శనం నా అనుభవాలే. నా మనసు బాగలేనప్పుడు నేను వాటినే మళ్ళీమళ్ళీ తలుచుకొని, 'ఆ సమస్యల నుండి గట్టెక్కించిన బాబా ఇప్పుడు కూడా నన్ను అనుగ్రహిస్తారని' నమ్మకం వహిస్తాను. ఇకపోతే, నేనిప్పుడు కొన్ని అనుభవాలు పంచుకుంటున్నాను. వాటిలో ఒకటి నేను ఎలా జరగాలని కోరుకున్నానో అలానే జరిపించారు బాబా. నేను 9 నెలల గర్భవతిగా ఉన్నపుడు నా మలద్వారం వద్ద పుండు లేచింది. మొదట మొలలు ఏమో! గర్భంతో ఉన్నప్పుడు సాధారణంగా వస్తాయనుకున్నాను. కానీ  రోజురోజుకి నొప్పి ఎక్కువై కూర్చోలేని పరిస్థితి వచ్చి డాక్టర్ దగ్గరకి వెళ్తే, "అది చీము గడ్డ. యాంటీబయాటిక్స్ ఇస్తాను. వాటికి తగ్గకపోతే చిన్న సర్జికల్ ప్రాసెస్ చేయించుకోవాల్సి ఉంటుంది" అని చెప్పింది. మరో 15 రోజుల్లో కాన్పు ఉండగా ఆ సమస్య వచ్చినందుకు నేను చాలా ఆందోళన చెందాను. నొప్పి తీవ్రమై నేను కూర్చోలేని, పడుకోలేని, నిలబడలేని పరిస్థితితో 2 రోజులు చాలా బాధపడుతూ తట్టుకోలేక ఏడ్చాను. మా నాన్న నా బాధ చూడలేక డాక్టర్లకి ఫోన్ చేసి మాట్లాడటం మొదలుపెట్టారు. దూరంలో ఉండే హాస్పిటల్ అయితే నేను వెళ్ళలేనని దగ్గర్లో ఉండే డాక్టర్‌కి ఫోన్ చేస్తే, ఆయన "వెంటనే వస్తే, సర్జికల్ ప్రొసీజర్ చేస్తాను. నొప్పి ఉండదు, రండి" అని చెప్పారు. నేను చాలా కష్టపడుతూ వెళ్లి, డాక్టర్ గది ముందు అతి ప్రయాసతో కూర్చున్నాను. అప్పుడు నాకు బాబా చరిత్రలోని పిళ్ళై నారి కురుపుల లీల గుర్తుకు వచ్చి, "ఆ లీలలో లాగా నా బాధను మరుజన్మకి వాయిదా వేయమని" బాబాను ప్రార్థించాను. తర్వాత డాక్టర్ పిలిచారు. నేను లోపలకి వెళ్ళాక ఆయన పరీక్షిస్తుంటే అద్భుతం జరిగింది. పిళ్ళై కురుపులాగా నాకున్న పుండు పగిలిపోయింది. సర్జికల్ ప్రొసీజర్ లేకుండానే ఆ పుండు బాధ తగ్గింది. డాక్టర్ "పుండు పగిలింది. నర్సుతో క్లీన్ చేయించుకొని వెళ్ళండి" అని అన్నారు. నర్స్ క్లీన్ చేసేటప్పుడు నొప్పి కలిగినప్పటికీ క్లీనింగ్ అవ్వగానే అప్పటిదాకా పడ్డ బాధ అంతా నిమిషాల్లో తగ్గిపోయింది. ఏడుస్తూ హాస్పిటల్‌కి వెళ్లిన నేను నొప్పి తగ్గి ప్రశాంతంగా ఇంటికి వచ్చాను. నా చేత పిళ్ళైలా కర్మఫలం అనుభవింపజేసి నిమిషాల్లో నన్ను మామూలుగా చేసారు బాబా.


ఇక నా మరో అనుభవం నానాచందోర్కర్ కుమార్తె మైనతాయి అనుభవం లాంటిది. నా కాన్పుకి నిర్ణయించిన రోజు నేను వెళ్ళి హాస్పిటల్లో అడ్మిట్ అయ్యాను. నాకు నొప్పులు రావడానికి సెలైన్ పెట్టారు. ఒకపక్క నొప్పులు తట్టుకోగలనో, లేదో అని, ఇంకోపక్క నొప్పులు రాకపోతే సి సెక్షన్ చేయించుకోవాల్సి వస్తుంది అన్న భయాలతో నాకు చాలా గాబరాగా అనిపించింది. అయితే 3 రోజులైన నొప్పులు రాకపోయేసరికి డాక్టర్ ఆపరేషన్ చేస్తామన్నారు. అప్పుడు నేను బాబాకి దణ్ణం పెట్టుకుని, "నాకు ఆపరేషన్ వద్దు బాబా. నొప్పులు వచ్చి నార్మల్ డెలివరీ అయితే బాగుంటుంది" అని అనుకున్నాను. ఆ తర్వాత వేరే డ్యూటీ డాక్టర్ వచ్చి, పరీక్ష చేసి, "స్కాన్ తీసి నెల అవుతోంది కాబట్టి ఇంకోసారి తీయించండి. ఎందుకు నొప్పులు రావడం లేదో అర్థమవుతుంది" అని చెప్పింది. మేము వెళ్ళి స్కాన్ తీయిస్తే, అందులో అంత నార్మల్‌గానే ఉంది. ఆ స్కాన్ రిపోర్ట్ ప్రకారం కాన్పుకి ఇంకా ఒక వారం ఉందని తేలింది. మొదటి డాక్టరు, "నొప్పులు రావడానికి 3 రోజులు సెలైన్ పెట్టినందువల్ల ఇక నార్మల్ కాన్పుకి వెయిట్ చేయొద్దనుకున్నాం కానీ, ఆమె స్కాన్ ప్రకారం ఇంకా టైమ్ ఉంది. కాబట్టి 4 రోజులు వెయిట్ చేద్దాం" అని చెప్పింది. నేను బాబా దయవల్ల అప్పటికి ఆపరేషన్ ఆగింది అనుకున్నాను. ఆ తర్వాత రెండో రోజు ఉమ్మ నీరు లీక్ అవడం, నొప్పులు కూడా మొదలవడం జరిగింది. నొప్పులు తీవ్రతరం అవుతున్నప్పుడు నాకు బాబా తప్ప ఇంకెవరూ గుర్తు రాలేదు. నన్ను ఆ వేదన నుండి తొందరగా బయటపడేయమని, లేకపోతే తన దగ్గరకైనా చేర్చుకోమని మనసులో కుమిలిపోయాను. "బిడ్డ పుట్టాక శిరిడీ తీసుకొచ్చి ద్వారకామాయిలో ఆయన పాదాల చెంత ఉంచుతాను" అని బాబాకి మొక్కుకున్నాను. ఇంకా బాబా చరిత్రలోని మైనతాయి లీల తలుచుకుంటూ గడిపాను. తన బిడ్డ బాధ చూడలేక కాబోలు ఆ తండ్రి 6 గంటల్లో నాకు ప్రసవం అయ్యేలా అనుగ్రహించారు. చాలామందికి 24 గంటలు, 12 గంటలు ఉండే పురిటి నొప్పులు నాకు కేవలం 6 గంటలు ఉండటం బాబా అనుగ్రహంగా భావించాను. అన్నిటికంటే పెద్ద వరం నాకు బాబు పుట్టడం. ఎందుకిలా అంటున్నానంటే, మా ఇంట్లో మేము ఇద్దరం ఆడపిల్లలం. అందుకని నాకు బాబు పుట్టాలని కోరుకున్నాము. దాన్ని బాబా నెరవేర్చారు. త్వరలోనే నా మొక్కు తీర్చుకోవడానికి శిరిడీ వెళ్తాను. ఇకపోతే, కాన్పు అనంతరం నా కాళ్ళు పట్టుకుపోయి 15 రోజులు నడవలేకపోయాను. కానీ బాబా అనుగ్రహం వల్లనే కొద్దిరోజుల్లో నేను మామూలు అయ్యాను. ఆ తర్వాత ఒక వారందాకా మా బాబుకి నా పాలు తాగడం అలవాటు కాలేదు. అప్పుడు మళ్ళీ బాబానే దిక్కు అని, ఆయన్ని ప్రార్థించుకున్నాక బాబు పాలు తాగడం మొదలుపెట్టాడు. అప్పుడప్పుడు మళ్ళీ తాగేవాడు కాదు గాని, బాబాకి మ్రొక్కుకున్నంతనే తాగేవాడు. ఇలా డెలివరీ అప్పుడు, డెలివరీ తర్వాత బాబా నన్ను అనుగ్రహించారు. ఈ విధంగా ఆయన ప్రతిక్షణం నా మొర ఆలకిస్తూ, నా కోరికలు తీరుస్తూ నాకు క్షేమమైనది చేస్తూ నన్ను అనుగ్రహిస్తున్నారు. ఆయనను నమ్మడమే మనం చేయాల్సింది. ఆయన చేసేదే మనకు శ్రేయస్కరం. "చాలా చాలా ధన్యవాదాలు బాబా".

రాజాధిరాజ యోగిరాజ పరబ్రహ్మ శ్రీ సచ్చిదానంద సద్గురు సాయినాథ్ మహారాజ్ కి జై!!!
Read More

సాయిభక్తుల అనుభవమాలిక 2086వ భాగం....

8 comments:
ఈ భాగంలో అనుభవాలు:

1. వృత్తి జీవితం గురించి బాబా భరోసా
2. అడ్డంకులు తొలగించిన బాబా
వృత్తి జీవితం గురించి బాబా భరోసా

నా పేరు మాధవి. మేము యూఎస్ఏలో ఉంటాము. ఒకసారి మా బాబుకి ఒక వారం పాటు సెలవులు వచ్చాయి. అప్పుడు మేము మరో రెండు కుటుంబాలతో కలిసి గుడికి వెళ్లాలని ముందుగా ప్రణాళిక వేసుకున్నాము. ఆ సమయంలో నేను నా వృత్తి జీవితంలో చాలా క్లిష్టమైన దశను ఎదుర్కొంటున్నాను. నా వృత్తి జీవితంలో వచ్చిన విరామాల వల్ల ఉద్యోగం సంపాదించడం, దాన్ని నిలబెట్టుకోవడం నాకు సవాలుగా మారాయి. నేను కొత్త విషయాలు నేర్చుకోవడానికి, కొత్త అవకాశాలను అన్వేషించడానికి అన్ని విధాలా సాధ్యమైన అన్ని ప్రయత్నిస్తున్నప్పటికీ నేను చాలా నిరాశకు గురై ఉన్నాను. ఆ స్థితిలో నేను నా సర్వస్వాన్ని బాబా పాదపద్మాల వద్ద సమర్పించి, నా పరిస్థితిని సరిచేయమని ఆయన్నే ప్రార్థించాను. తర్వాత 'ఈ సెలవుల్లో గుడిని సందర్శించగలిగితే, అది నా వృత్తి విషయంలో ఆయన ఆశీర్వాదాలకు సంకేతంగా భావిస్తానని' నాకు నేను చెప్పుకున్నాను. అయితే దురదృష్టవశాత్తు సెలవుల్లో జ్వరమొచ్చి నేను అనారోగ్యం పాలయ్యాను. మా ప్రయాణ సమయానికి కోలుకుంటానని ఆశించాను కానీ, నాకు నయం కాలేదు. నేను మాత్రమే కాదు, నా భర్త, మాతోపాటు రావాలనుకున్న ఇతర కుటుంబసభ్యులు కూడా జబ్బునపడ్డారు. నాకు చాలా నిరాశ కలిగి, 'బహుశా నా వృత్తి విషయంలో బాబా నాకు ఎలాంటి భరోసా ఇవ్వడం లేదేమో' అని ఆలోచించడం మొదలుపెట్టాను.

మేము ప్రయాణం అనుకున్న రోజు నాకు కొంచెం నయంగా అనిపించింది. కానీ నా భర్తకు ఇంకా ఒంట్లో బాగోలేదు. కనీసం నాకైనా దగ్గరలోని గుడికి వెళ్ళే అవకాశం కల్పించమని బాబాను ప్రార్థించి నా భర్తను అడిగాను. అయన ఆరోజు డ్రైవ్ చేయలేనని చెప్పి, మరుసటిరోజు వెళ్దామని అన్నారు. అది విని నాకు, 'బహుశా నేను కోరుకున్నట్టు జరగాలని లేదేమో!, నా కర్మలో భాగంగా నేను ఈ దశను ఎదుర్కోవలసిందేనేమో!' అని బాధగా అనిపించింది. ఏదేమైనా విషయాన్ని బాబాకు అప్పగించి ఊరుకున్నాను. కానీ ఒక అనూహ్య సంఘటన జరిగింది. సాయంత్రం సుమారు 5:30 గంటలకు నా భర్త అకస్మాత్తుగా, "మనం గుడికి వెళదామా?" అని అడిగారు. నేను ఆయన ఆరోగ్యం బాగుందో, లేదోనని, "రేపు వెళ్లొచ్చు" అని అన్నాను. అందుకు ఆయన 'తాను బాగానే ఉన్నానని, కారు నడపగలనని' అన్నారు. బాబాపట్ల నాకు అపారమైన కృతజ్ఞతాభావం కలిగింది. ఆ క్షణంలో నాకు ఎంత సంతోషం కలిగి ఉంటుందో మీరు ఊహించగలరనుకుంట! 

తర్వాత మేము గుడికి బయలుదేరుతుండగా, బాబా పసుపు రంగు వస్త్రాలు ధరించి ఉండాలని నా మనసులో ఒక చిన్న కోరిక మెదిలింది. ఒక క్షణం పాటు ఆ కోరిక నా మదిలో బలంగా ఉన్నప్పటికీ, అంత బలంగా కోరుకోవడం అత్యాశ అవుతుందేమోనని కూడా అనుకున్నాను. ఆ ఆలోచనలతోనే నేను గుడికి ప్రయాణం సాగించాను. మేము గుడికి వెళ్లేసరికి బాబా పసుపు రంగు వస్త్రాల్లో దర్శనమిచ్చారు. ఆయనను ఆ విధంగా చూడగానే నా ఆనందానికి అవధులు లేవు. నేను బాబాను, "నేను నా వృత్తి జీవితంలో విజయం సాధించాలి. ఇతరులపై ఆధారపడకుండా స్వతంత్రంగా పనిచేసే సామర్థ్యాన్ని నాకు ప్రసాదించండి" అని మనస్ఫూర్తిగా ప్రార్థించాను. ఇంటికి తిరిగి వచ్చాక అంతకంటే అందమైన సంఘటన జరిగింది. ఆ రాత్రి నాకు ఒక కల వచ్చింది. ఆ కలలో బాబా గుడిలో బ్రహ్మదేవునిగా ఏదో వ్రాస్తూ కనిపించారు. నేను నిద్రలేచినప్పుడు నాకు ప్రగాఢమైన శాంతి, ఆనందం అనుభవమయ్యాయి. బాబా నా విధి వ్రాతను మార్చి వ్రాస్తున్నారని, ఆ విధంగా నాకు ఆయన భరోసా ఇస్తున్నారని నేను నమ్మాను. ఆరోజు నుండి నా వృత్తి జీవితం గురించి నాకు ఆందోళన లేదు. నేను ఇంకా పూర్తిగా స్థిరపడకపోయినప్పటికీ నేను నా వంతు కృషి చేస్తూ ఉంటాను, మిగిలినది బాబా చూసుకుంటారని నాకు పూర్తి విశ్వాసముంది. "చాలా ధన్యవాదాలు బాబా. దయచేసి ఈ జన్మలోనే కాకుండా ప్రతి జన్మలోనూ మాతో ఎల్లప్పుడూ ఉండండి".
అడ్డంకులు తొలగించిన బాబా

సాయిభక్తులకు నా నమస్కారం. నా పేరు ఈశ్వరి. మాది శ్రీకాకుళం. బాబాపట్ల నాకు పూర్తి విశ్వాసం. నా బాధల్లో, కష్టాల్లో తోడుగా ఉంటానని ఆయన ఎన్నోసార్లు నాకు నమ్మకం కలిగించారు. ఒకసారి మేము తిరుపతి వెళ్లే ప్రయాణం పెట్టుకున్నాం, దర్శనం టికెట్లు, రానూపోనూ ట్రైన్ టికెట్లు అన్నీ బుక్ చేసుకున్నాము. అయితే అనుకోకుండా దర్శనంకి వెళ్లేరోజు నా నెలసరి సమయం అయింది. అందువల్ల, "నెలసరి ముందుగా రావాల"ని బాబాను వేడుకున్నాను. బాబా దయవల్ల అద్భుతం జరిగినట్టు ఏడు రోజుల ముందే నెలసరి వచ్చేసింది. నేను మనసారా బాబాకి కృతజ్ఞతలు చెప్పుకున్నాను. తర్వాత ఇప్పుడు ఇంకే సమస్య లేదు అనుకునేలాగా మావారికి ఆడిట్ అని ఆఫీస్ నుంచి ఫోన్ వచ్చింది. మేము ప్రయాణం పెట్టుకున్న రోజే ఆడిట్ అని చెప్పడంతో మావారు టెన్షన్ పడ్డారు. నేను మనసులో, 'ఆడిట్ మేము తిరుపతి నుంచి వచ్చిన తర్వాత పెడితే బాగుంటుంది' అనుకొని బాబాను తలుచుకున్నాను. ఆరోజు రాత్రి మావారికి 'ఆడిట్ పోస్ట్ పోన్ అయింద'ని మెసేజ్ వచ్చింది. ఇదంతా బాబా వల్లే జరిగిందని నాకు తెలుసు గనక మనసులోనే కృతజ్ఞతలు చెప్పుకున్నాను.

ఓం శ్రీ సచ్చిదానంద సమర్థ సద్గురు సాయినాథ్ మహారాజ్ కి జై.
Read More

సాయిభక్తుల అనుభవమాలిక 2085వ భాగం....

9 comments:
ఈ భాగంలో అనుభవాలు:

1. అంతా బాబా దయ
2. బాబా ఊదీ అనుగ్రహం
అంతా బాబా దయ

సాయిభక్తులకు నమస్కారాలు. నా పేరు కోమలవల్లి. 2026, ఫిబ్రవరిలో నేను విపరీతమైన దగ్గు, గొంతునొప్పితో బాధపడ్డాను. గొంతు నుంచి మాటలు కూడా రాలేదు. మా అమ్మ వాళ్ళింటికి వెళ్ళినప్పుడు డాక్టరుకి చూపించుకుంటే, మూడు రోజులకు మందులిచ్చారు. కానీ ఆ మందులు అయిపోయినా నాకు తగ్గలేదు. మా అమ్మవాళ్ళు, "వచ్చి చూపించుకొని వెళ్ళు" అన్నారు. కానీ మావారు హాస్పిటల్‌కి వెళ్తానంటే అరుస్తారు. నా పరిస్థితి చూస్తే,  గొంతునొప్పి, దగ్గు వలన ఏమీ తినలేకపోయేదాన్ని. కేవలం వేడి నీరు మాత్రమే తాగగలిగేదాన్ని. రాత్రిపూట విపరీతమైన దగ్గు, ముక్కు నుండి శ్వాస ఆడక చాలా ఇబ్బందిపడేదాన్ని. ఇలా ఉండగా ఒకరోజు రాత్రి నేను ఇంక భరించలేకపోయాను. నాకు ఎప్పుడు ఆరోగ్యం బాగలేకపోయినా ఎంతవరకు భరించగలనో అంతవరకు భరిస్తాను, ఇక నావల్ల కాదన్నప్పుడు బాబా ఊదీయే నాకు ఔషధం. రాత్రి 1:30 ప్రాంతంలో బాబాను, "దగ్గు, గొంతునొప్పి తగ్గించి ప్రశాంతమైన నిద్రని ప్రసాదించు బాబా" అని వేడుకొని కొంచెం ఊదీ గొంతుకి రాసుకొని, మరికొంత ఊదీ నోట్లో వేసుకున్నాను. అయితే ఆ తర్వాత కూడా విపరీతంగా ఇబ్బందిపడి ఏడ్చేసాను. తెల్లవారుజామున 4:30 గంటలకు నిద్రపట్టింది. రాత్రి అంతలా ఇబ్బందిపడినా ఉదయం 6 గంటలకు నిద్ర లేచేసరికి చాలా ప్రశాంతంగా అనిపించింది. వరసగా మూడురోజులు ఊదీ గొంతుకు రాసుకొని, కొద్దిగా నోట్లో వేసుకుంటుంటే, గొంతునొప్పి, దగ్గు పూర్తిగా తగ్గిపోయాయి. అంతా బాబా దయ.

2026, మార్చి 31న మా మామయ్యగారు చనిపోయారు. మేము 7వ రోజు కొన్ని కార్యక్రమాలు చేస్తాం. అందుకోసం నేను స్కూల్లో ఏప్రిల్ 1వ తేదీన నాకు ఏప్రిల్ 6వ తేదీన సెలవు కావాలని అడిగాను. అయితే ఏప్రిల్ 2వ తేదీన హఠాత్తుగా మా తోడికోడలు ఫోన్ చేసి, "7వ రోజు కార్యక్రమం 5వ రోజు అంటే ఏప్రిల్ 4న పెట్టుకుందామ"ని అంది. ఆరోజు నా సహోద్యోగి సెలవు తీసుకుంటున్నందున నాకు సెలవు ఇవ్వరు. ఆ విషయం చెప్పినా మా తోడికోడలు ఒప్పుకోలేదు. అప్పుడు నేను, "బాబా! ఎలాగైనా కార్యక్రమం 7వ రోజు జరిగేలా చూడండి. నేను ఏం చెప్పినా మా తోడికోడలు ఒప్పుకోదు. నీదే భారం" అని బాబాను వేడుకున్నాను. ఆరోజు సాయంత్రం నేను ఇంటికి వెళ్ళాక మా తోడికోడలు, "కార్యక్రమం 5వ రోజు చేయకూడదు. కాబట్టి 7వ రోజు చేద్దామ"ని అంది. ఇదంతా బాబా దయ మాత్రమే. "శతకోటి ధన్యవాదాలు బాబా".
Read More

సాయిభక్తుల అనుభవమాలిక 2084వ భాగం....

10 comments:
ఈ భాగంలో అనుభవాలు:

1. అడుగడుగునా కాపాడుతున్న బాబా
2. సమస్యలేమీ లేకుండా అనుగ్రహించిన బాబా
Read More

సాయి మహారాజ్ సన్నిధి సోషల్ మీడియా లింక్స్:

సాయి మహారాజ్ సన్నిధి సోషల్ మీడియా లింక్స్:

Subscribe Here

బ్లాగ్ అప్డేట్ నోటిఫికేషన్స్ నేరుగా మీ మెయిల్ కే వచ్చేందుకు క్రింద బాక్సులో మీ మెయిల్ ఐడి టైపు చేసి subscribe పై క్లిక్ చేసి, తరువాత స్టెప్స్ పూర్తీ చేయండి.

Delivered by FeedBurner

Followers

Recent Posts


Blog Logo