సాయి వచనం:-

- శ్రీబాబూజీ.

సాయిభక్తుల అనుభవమాలిక 2075వ భాగం....

6 comments:
ఈ భాగంలో అనుభవాలు:

1. 'నేను ఉండగా ఎందుకు భయపడుతున్నావు?'
2. అడిగినంతనే గొడవ సద్దుమణిగేలా అనుగ్రహించిన బాబా
3. బాబా దయ ఉంటే అనుకున్నవన్నీ జరుగుతాయి
అడిగినంతనే గొడవ సద్దుమణిగేలా అనుగ్రహించిన బాబా

సాయి బంధువులందరికీ నమస్కారం. నేను సాయి భక్తురాలిని. పెళ్లయ్యాక నాకు, నా భర్తకి మధ్య ఎప్పుడు ఏ సమస్య వచ్చినా 10 రోజులకి మించి ఎప్పుడూ మాట్లాడుకోకుండా ఉండక ఇద్దరిలో ఎవరో ఒకరం మాట్లాడి గొడవని ఆపేసేవాళ్ళము. అయితే ఇటీవల ఒకసారి జరిగిన గొడవలో నాకు నా భర్త ప్రవర్తన అస్సలు నచ్చలేదు. నేను కోపంలో కుటుంబానికి సంబంధించిన వ్యక్తిగత విషయం ప్రస్తావించి నా భర్తని ప్రశ్నించాను. దాన్ని ఆయన చాలా సీరియస్‌గా తీసుకున్నారు. అందువల్ల నేను అలా మాట్లాడటంలో నా తప్పు లేకపోయినప్పటికీ మేము ఒక నెల మాట్లాడుకోలేదు. అప్పుడు నాకెందుకో ఇది కరెక్ట్ కాదనిపించి బాబాని తలుచుకుని, "వచ్చే గురువారం లోపు నా భర్త మారి ఈ గొడవ ఇక్కడితో సమసిపోవాలి" అని అనుకొని శిరిడీ నుండి తెచ్చిన ఊదీ నీళ్ళలో కలుపుకొని తాగాను. తర్వాత నా భర్త, "ఈ సమస్యని ఇక్కడితో ఆపేసి నేను ఇంతకు ముందులా మామూలుగా ఉండాలనుకుంటున్నాను" అని మెసేజ్ చేసారు. నేను ఆ మెసేజ్ చూసి, 'వాళ్ల అమ్మ ఏమైనా నచ్చజెప్పరేమో అనుకున్నాను'. కానీ తర్వాత తెలిసింది, 'వాళ్ల అమ్మ ఆశలు ఏం చెప్పలేదు, తనే మారారు' అని. అంతేకాదు, తను మెసేజ్ చేసింది గురువారం నాడు అని తెలిసి షాకయ్యాను. "ధన్యవాదాలు బాబా. మీకు కాకడ ఆరతి ఇవ్వాలని 2 సంవత్సరాల నుండి అనుకుంటున్నాను. కానీ నా వల్ల అస్సలు అవ్వట్లేదు. అది జరిగేలా నువ్వే చూడు బాబా. ఇంట్లో నిన్ను వదిలి నాకు ఎక్కడికీ వెళ్ళనిలేదు. దయచేసి ఎక్కడికీ పంపించకు బాబా. రోజూ మిమ్మల్ని శుభ్రం చేసి, మీకు రోజూ 4 అరతులిచ్చి, మంచిగా పూజ చేసి, తిండి పెట్టి సచ్చరిత్ర పారాయణ చేయాలని ఉంది. దానికే నా జీవితంలో మొదటి ప్రాధాన్యత. ఆ రోజులు ఎప్పుడు వస్తాయా అని ఎదురు చూస్తున్నాను బాబా. తొందరగా అనుగ్రహించండి బాబా".
Read More

సాయిభక్తుల అనుభవమాలిక 2074వ భాగం....

6 comments:
ఈ భాగంలో అనుభవం:

  • నమ్మకాన్ని వృధా కానివ్వరు బాబా
Read More

సాయిభక్తుల అనుభవమాలిక 2073వ భాగం....

9 comments:
ఈ భాగంలో అనుభవాలు:

1. తలచినంతనే ఆరోగ్యం ప్రసాదించే బాబా
2. బాబా చేసిన సహాయం
తలచినంతనే ఆరోగ్యం ప్రసాదించే బాబా

శ్రీసాయినాథ్ మహరాజ్ కీ జై. ఓం శ్రీసాయినాథాయ నమః. ముందుగా శ్రీసాయి దివ్య పాదపద్మాలకు నా శతకోటి సాష్టాంగ ప్రణామములు. సాయి భక్తులకు నమస్కారాలు. నా పేరు డా. కృష్ణ. మాది హైదరాబాద్. శ్రీసాయే మా జీవితం. నిజంగా ఈ బ్లాగు శ్రీసాయి భక్తులపాలిట ఒక వరం. అసంఖ్యాకమైన సాయిలీలలను సంతోషంగా తోటి సాయి భక్తులతో పంచుకోవడానికి, వాటిని చదివి బాబా ప్రేమను అనుభూతి చెందడానికి, ఇంకా ఆ సాయీశ్వరుని యందు భక్తివిశ్వాసాలు మరింతగా బలపడటానికి ఈ బ్లాగు ఎంతో ఉపయోగపడుతుంది. ఇక నా అనుభవాల విషయానికి వస్తే..  2025, సెప్టెంబరు 28న నేను దగ్గు, జలుబు, కఫంతో నా జీవితంలో ఎన్నడూ అనుభవించని నరకయాతన అనుభవించాను. ఒక 7-8 రోజులు రాత్రంతా విపరీతమైన దగ్గు, జలుబు, స్వల్ప జ్వరంతో చాలా బాధపడ్డాను. అదే వారంలో(అక్టోబర్ నెల మొదటి వారంలో) దసరా పండగ వచ్చింది. ఆరోజు నేను బాబాను తలచుకొని దీనంగా, "బాబా! ఈ జబ్బు తగ్గేటట్లు చేయండి" అని ప్రార్థించాను. శ్రీసాయి దయతో వారం రోజుల తరువాత నా జీవితంలో ఎన్నడూ అనుభవించని బాధనుండి నన్ను బయటపడేశారు. తరువాత సాయి సచ్చరిత్రలోని శ్రీసాయిబాబా కూడా సెప్టెంబరు నెల 28న జ్వరంతో బాధపడి 1918, అక్టోబర్ 15, దసరా పండుగ రోజు మహాసమాధి చెందిన విషయం గుర్తుకు వచ్చి, 'అదే రోజులలో శ్రీసాయి నా కర్మ ఫలితం అనుభవించేలా చేసారని' నాకనిపించింది. "ధన్యవాదాలు బాబా".

2026, జనవరి 8, గురువారం నా తండ్రి లోబీపీ, షుగర్ వ్యాధి వల్ల డీహైడ్రేషన్‌కి గురై చాలా క్లిష్ట పరిస్థితి ఎదుర్కోన్నారు. ఆయన వయస్సు 85 సంవత్సరాలైనందున నేను చాలా భయపడిపోయి శ్రీసాయినాథుని పాదాల చెంత నా మొర ఆలకించమని వేడుకొని ప్రతిక్షణం బాబాను ప్రార్ధించాను. బాబా దయవల్ల ఐసీయూలో.ఉన్న నా తండ్రి తక్కువ బిల్లుతో ఆ కష్టం నుండి బయటపడి ఇప్పుడు ఆరోగ్యంగా ఉన్నారు.  

ఒకసారి హాస్టల్లో ఉండి 8వ తరగతి చదువుతున్న నా కొడుకుకి చర్మ వ్యాధి సోకింది. ఎన్ని మందులు వాడినా నయం కాలేదు. అప్పుడు బాబాను వేడుకొని రోజూ బాబా పవిత్ర ఊదీ వాడితే, ఆ సాయినాథుడు కరుణించి ఆ చర్మ వ్యాధిని నయం చేసారు. " మా సాష్టాంగ ప్రణామాలు బాబా. మీ కృపాకటాక్షాలు మా మీద కురిపించినందుకు మీకు ధన్యవాదాలు తండ్రీ. ఇలాగే మీ ఆశీస్సులు ఎప్పుటికీ మాపై ఉండేలా చూడు తండ్రీ. మీ భక్తులందరినీ ఇలాగే కాపాడు బాబా. మీరే నాకు తల్లి, తండ్రి, గురువు, దైవం అన్నీ బాబా. ప్రతి శ్వాసలో నీ పేరు జపించడం తప్ప ఏమిచ్చి మీ ఋణం తీర్చుకోగలం తండ్రీ?".

సర్వం సాయినాథార్పణమస్తు.
బాబా చేసిన సహాయం

ఓం సాయినాథాయ నమః. నా పేరు కృష్ణసౌమ్య. నేను సాయిబాబా బిడ్డను. నేను ఇప్పుడు బాబా నాకు ఇటీవల చేసిన సహాయం గురించి పంచుకుంటున్నాను. నేను ఒక MNC కంపెనీలో పని చేస్తున్నాను. నేను మీటింగ్స్‌లో ఉంటే మా చిన్నబాబు చాలా అల్లరి చేస్తుంటాడు. నా పని చేసుకుంటూ తనని చూసుకోవడం నాకు చాలా కష్టంగా ఉంటుంది. అయితే నేను నా తల్లిదండ్రులతో ఉండటంవల్ల వాళ్ళు బాబుని చూసుకుంటుంటే, నేను నా పని చేసుకుంటుంటాను. కొత్తగా నన్ను ఒక ప్రాజెక్ట్‌లో వేశారు. కానీ పని ప్రారంభించడానికి కావలసిన అనుమతులు నాకు రానందున నేను పని మొదలు పెట్టలేకపోయాను. కొన్నిరోజులు ఆ అనుమతులు రాకపోవడంతో నాకు పెద్దగా పని ఉండేది కాదు. కాబట్టి నా తల్లిదండ్రులు ఎక్కడికైనా వెళ్లినా నేను బాబుని చూసుకోగలిగాను. కానీ అనుమతులు వచ్చే సమయానికి నా తల్లిదండ్రులు ఊరు వెళ్లారు. అనుమతులు వచ్చాయి కాబట్టి మేనేజర్ ఖచ్చితంగా పని గురించి అడుగుతారు. నేనేమో బాబుని చూసుకొంటూ పని చేసుకోలేను. అందువల్ల నేను బాబాను, "అమ్మానాన్న లేని సమయంలో అనుమతులు వచ్చాయి. ఇప్పుడు పని మొదలుపెట్టాలి. కానీ బాబుని చూసుకుంటూ పని చేయడం చాలా కష్టం. కాబట్టి అమ్మానాన్న లేని ఈ మూడు రోజులు పని లేకుండా చూడండి బాబా” అని ప్రార్థించాను. నిజంగా బాబా నా  జీవితంలో ఒక అద్భుతం  చేసారు. అనుమతులు వచ్చినా మేనేజర్ నాకు పని కేటాయించలేదు, పని గురించి నన్ను అసలు ఏమీ అడగలేదు. ఇకపోతే అదే సమయంలో ఆఫీసుకి రావాలని మేనేజర్ చెప్పారు. బాబును ఇంకొకరి ఇంట్లో వదిలి వెళ్లడం చాలా కష్టమైనందున నేను నా మనసులో బాధపడుతూ బాబాను, "నా కొడుకుని అన్నయ్య వాళ్ళింట్లో వదిలి వెళ్తాను. అక్కడ తనకి ఏ ఇబ్బందీ రాకుండా చూడండి బాబా” అని ప్రార్థించాను. బాబా మళ్లీ అద్భుతం చేశారు. ఆఫీసుకి వెళ్లాల్సిన అవసరం లేకుండా చేశారు. నేను ఆఫీస్‌కి రాలేనని మేనేజర్‌కి ఓపెన్‌గా చెప్తే, మేనేజర్ ఏమీ అనలేదు. ఆ రోజు గురువారం. నేను నా కొడుకుని తీసుకొని బాబా గుడికి వెళ్లాను. నిజంగా బాబా చేసిన సహాయం ఎంత చెప్పినా తక్కువే. ఆ తండ్రి మనల్ని ఎప్పుడూ కాపాడుతూనే ఉంటారు. "ధన్యవాదాలు బాబా".
Read More

సాయిభక్తుల అనుభవమాలిక 2072వ భాగం....

10 comments:
ఈ భాగంలో అనుభవం:

  • చివరి నిమిషం అద్భుతాలు బాబా మాత్రమే చేయగలరు!!
శ్రీ సచ్చిదానంద సద్గురు సాయినాథ్ మహారాజ్ కి జై. ఓం శ్రీ సాయినాథాయ నమః: సాయి బంధువులందరికీ నమస్కారాలు, నా పేరు విజయ. నేను డిగ్రీ మొదటి సంవత్సరం చదువుతున్నప్పుడు నాకు బాబా గురించి తెలిసింది. అప్పటినుండి నేను అడిగినవి, మనస్సులో 'ఇలా అయితే బాగుంటుంది కదా బాబా!!' అని అనుకున్నవి, ఇలా ప్రతిదీ నెరవేరుస్తున్నారు బాబా. నేను ఎవరితోనూ అంతగా కలవలేను. నాకు బెస్ట్ ఫ్రెండ్స్ అంటూ ఎవరూ లేరు. నాకు అన్ని బాబానే. ఒక ఫ్రెండ్‌కి చెప్పుకున్నట్లు అన్ని బాబాతోనే చెప్పుకుంటాను. నేను పొద్దున్న నిద్రలేచినప్పటినుండి రాత్రి నిద్రపట్టే చివరి నిమిషం వర\కు 'సాయి సాయి.. బాబా బాబా' అనుకుంటూ ఉంటాను. బాబా వల్లనే నేను ఈరోజు యుఎస్ఏలో వున్నాను. నాకు ఒక బాబు(సెకెండ్ ఇయర్ అండర్ గ్రాడ్‌లో వున్నాడు), ఒక పాప(నాలుగు చదువుతుంది). నేను H1B వీసా మీద వున్నాను. నా భర్త H4 EAD మీద రెస్టారెంట్ బిజినెస్ పెట్టుకున్నారు. అంత బాగానే వుంది అనుకుంటుంటే, 2025, జూలైలో నా ఉద్యోగం కాంట్రాక్ట్ అయిపోయింది. వేరే ఉద్యోగం చూసుకుందామంటే, H1B వీసా మీద ఉన్నవాళ్ళకి ఎవరూ ఉద్యోగ అవకాశం ఇవ్వని పరిస్థితి. అందువల్ల నేను పనిచేసిన కన్సల్టెన్సీవాళ్ళు 2026, ఫిబ్రవరి 6న 'ఫిబ్రవరి 20 లోపు ఏదో ఒక ఉద్యోగం కన్ఫర్మ్ అవ్వకపోతే, H1B వీసా రద్దు చేసేస్తామని' మెయిల్ పెట్టారు. నాకు చాలా టెన్షన్ వేసింది. ఏమి చేయాలో తెలియలేదు. "బాబా! ఏదో ఒక దారి చూపించు తండ్రీ" అని వేడుకొని 'సాయి సాయి' అని ఏడుస్తుంటే, హఠాత్తుగా ఒక పాత కంపెనీ ఒక సీనియర్ మేనేజర్ గుర్తుకు వచ్చారు. ఆ మేనేజర్‌కి ఫోన్ చేస్తే, చాలా బాగా మాట్లాడారు. నేను నా పరిస్థితి చెప్తే, అర్థం చేసుకుని "టెక్నికల్ ఇంటర్వ్యూ పెట్టిస్తాను. అది విజయవంతంగా పూర్తిచేస్తే, వెంటనే ఉద్యోగం కన్ఫర్మ్ చేస్తాను" అన్నారు.

ఫిబ్రవరి 13న ఇంటర్వ్యూ జరిగింది. తర్వాత రెండురోజులు వారాంతం, ఆ మర్నాడు సోమవారం కూడా సెలవు వచ్చింది. అందుచేత ఫిబ్రవరి 17, మంగళవారం ఏమైనా చెప్తారేమోనని నేను ఆశగా చూసాను. కానీ ఎటువంటి స్పందన రాలేదు. ఫిబ్రవరి 18న నా కన్సల్టెన్సీవాళ్ళు మళ్ళీ మెయిల్ చేసి, 'ఫిబ్రవరి 20లోపు ఉద్యోగ విషయం తేలకపోతే, ఫిబ్రవరి 27 చివరి తేదీ" అని తెలియజేసారు. నేను ఆ మేనేజర్‌కి ఫోన్ చేస్తే, 'తను ఎక్కడో కాన్ఫరెన్స్‌లో వున్నానని, ఫిబ్రవరి 20న తిరిగి వస్తానని, వచ్చాక ఉద్యోగంలోకి తీసుకుంటున్నట్టు మెయిల్ పెడతానని' అన్నారు. ఆ విషయం కన్సల్టెన్సీవాళ్ళకి తెలియజేసి ఫిబ్రవరి 20, ఉదయం 6 గంటల నుండి నేను నా మెయిల్స్ చూస్తూనే ఉండగా కన్సల్టెన్సీ వాళ్ళమో గంటగంటకి ఫోన్ చేసి, 'ఇంకా మెయిల్ రాలేదు' అని అడగసాగారు. నాకు తెలిసిన ‌ఆ మేనేజర్‌ని అడుగుదామంటే, అన్నిసార్లు ఫోన్ చేసి విసిగిస్తే అసలుకే వద్దంటారేమోనని భయపడి, "బాబా! ఏదో ఒకటి చేసి ఈ పరిస్తితి నుంచి నన్ను గట్టెక్కించండి" అని నా సాయితండ్రిని అడుగుతూ గడిపాను. ఇంకా బాబా సంకల్పమో ఏమోగానీ 12 గంటలకి నేను ఆ మేనేజర్‌కి ఫోన్ చేస్తే, 'తను తెల్లవారుజామున ఇంటికి వచ్చానని, ఆ వారంలోని పెండింగ్ పనులు చేసుకోవడంలో నిమగ్నమై నా విషయంలో సోమవారం అంటే ఫిబ్రవరి 23న మెయిల్ చేద్దామనుకున్నానని' చెప్పారు. అప్పుడు నేను నా పరిస్థితి గురించి మరోసారి గుర్తుచేసాక ఒక సంవత్సరం కాంట్రాక్ట్ ప్రాజెక్ట్‌లో నన్ను తీసుకుంటున్నట్లు మెయిల్ చేసారు. ఈ అద్భుతం బాబా వల్లనే జరిగింది. ఎంత ప్రయత్నించినా ఒక్క సానుకూల స్పందనా రాని పరిస్థితిల్లో చివరి నిమిషం అద్భుతాలు బాబా మాత్రమే చేయగలరు. ఆ దేవదేవుడైన ఆ సాయినాథుని పూర్తిగా నమ్మి, ఆయన మీద భారమేస్తే ఇంటి పెద్దల చూసుకుంటారు దయగల తండ్రి.

ఇకపోతే, ఆ మెయిల్ వచ్చాక సోమవారం హెచ్ఆర్ వాళ్ళు తదుపరి వర్క్ మొదలుపెడతారని చెప్పారు. కానీ అది జరగలేదు. నా ప్రస్తుత కంపెనీవాళ్ళు ఫిబ్రవరి 27 చివరిరోజని, ఆలోపు జాబ్ కన్ఫర్మ్ అవ్వకపోతే వీసా రద్దు అవుతుందంటున్నారని నా పరిస్థితి గురించి ముందే చెప్పి ఉన్నప్పటికీ ఫిబ్రవరి 23, సోమవారం నుంచి ఫిబ్రవరి 26, గురువారం వరకు రోజూ ఇమెయిల్ పెట్టినా, ఫోన్ చేసినా వాళ్ళు అస్సలు స్పందించలేదు. ఆ విషయం గురించి నేను రోజూ బాబాని అడుగుతుంటే, 'నీ ఉద్యోగ సమస్య పరిష్కారమవుతుంది', 'నువ్వు శుభవార్త అందుకోబోతున్నావు', 'అతి త్వరలోనే చివరి నిముషంలో అద్భుతం నిన్ను చేరనుంది, నీ జీవితాన్ని ఉన్నత స్థాయికి తీసుకెళ్లనుంది' అని ఎటు చూసినా సానుకూల సందేశాలు అందుతుండేవి. అయినా చివరి గడువు ఫిబ్రవరి 27వ తేదీ అని గుర్తొచ్చి భయాందోళనలకు గురవుతుండేదాన్ని. గురువారం పొద్దున్న మామూలుగా కంపెనీవాళ్ళకి మెయిల్ చేసి, బాబాతో నా ఆందోళన గురించి చెప్పుకుని, "నా పరిస్థితి చక్కబెట్టమ"ని అడిగాను. 'తర్వాత మీరు నిజంగానే మీ బిడ్డలందరితో ఉన్నట్టు నాతో కూడా ఉన్నట్టైతే, నా పక్కనుండి నా పరిస్థితి గమనిస్తున్నట్టైతే నాకు నిదర్శనం ఇవ్వండని' అనుకుంటూ 'సాయి మహారాజ్ సన్నిధి' బ్లాగులో భక్తుల అనుభవాలు చదువుతున్నాను. అంతే! ఆ మేనేజర్ నుంచి ఫోన్ వచ్చింది. ముందు నాకు సారీ చెప్పి, "అందరూ కొత్త ప్రాజెక్ట్ పనిలో బిజీగా వుండి స్పందించలేదు. ఇప్పుడే హెచ్ఆర్‌తో చెప్పి పేపర్ వర్క్ మొదలు పెట్టిస్తాన"ని చెప్పారు. నా బాబా నాతో వున్నానని, ఆర్తితో పిలిస్తే తప్పకుండ పలుకుతానని ఋజువు చేసారు. ఎన్ని సంవత్సరాల నుండి మనకి ఆ తండ్రి తెలిసినా, పరిస్థితులను బట్టి మళ్ళీ మళ్ళీ నిదర్శనాలు అడుగుతూనే ఉంటాం. దయగల తండ్రి మాత్రం తల్లిలా ప్రేమని కురిపిస్తునే వుంటారు. ఆయన తమ బిడ్డలు ఎప్పుడు పిలిచినా పలుకుతారు. ఆ తండ్రి పలికేవరకు మనకి ఓర్పు ఉండాలి. "అలా ఓర్పుతో ఉండగలిగే శక్తి ఇవ్వండి తండ్రీ. ఎప్పటికీ నన్ను మీ పాదాల నుండి దూరం చేయకండి. నేను ఏమైనా తప్పులు చేసుంటే క్షమించండి బాబా. నాకు, నా కుటుంబానికి ఎప్పుడూ తోడుగా ఉండండి. అమ్మానాన్నలని, అక్క, చెల్లి, అన్నయ్య వాళ్ళ కుటుంబాలకి, ఇంక అందరికీ ఎప్పుడూ అండగా ఉండి మా కష్టాలు దాటేలా చూడండి సాయితండ్రీ. చివరిగా మీకు అనంతకోటి వందనాలు తండ్రీ. ఏమి చెప్పినా, ఎన్నిసార్లు ధన్యవాదాలు చెప్పినా తక్కువే సాయి మీకు".

ఓం సాయినాథాయ నమః

సర్వేజన సుఖినోభవంతు
లోకా సమస్త సుఖినోభవంతు.
Read More

సాయిభక్తుల అనుభవమాలిక 2071వ భాగం....

8 comments:
ఈ భాగంలో అనుభవాలు:

1. సాయితండ్రి దయ
2. 'నేను నీతో ఉన్నాను కాబట్టి, అంతా సవ్యంగానే ఉంటుంది'
సాయితండ్రి దయ

ఓం శ్రీ సాయినాథాయ నమః. నేను ఒక సాయి భక్తురాలిని. సాయిబాబా దయవలన మా బాబు సీఏ పూర్తి చేశాడు. తర్వాత తనకి మంచి ఉద్యోగం ఇవ్వమని నేను ప్రతిరోజూ సాయినాథుని ప్రార్థిస్తూ ఉండేదాన్ని. బాబు మొదటిసారి తన స్నేహితులతో కలిసి ఇంటర్వ్యూ కోసం చెన్నై వెళ్లొచ్చాడు. ఆ తర్వాత ఆన్లైన్ ఇంటర్వ్యూలకి అటెండ్ అవుతుండేవాడు. సాయితండ్రి దయవలన తను ఇంటర్వ్యూలో అన్ని ప్రశ్నలకి సమాధానం చేయగలుగుతుండేవాడు. ఒక కంపెనీవాళ్ళు తనని సెలక్ట్ చేసామన్నారు. కానీ అది చిన్న కంపెనీ కావడంతో పెద్ద కంపెనీలు ఇచ్చే జీతం ఇస్తామన్నప్పటికీ ఆ కంపెనీలో పనిచేయడం వలన అభివృద్ధి అంతగా ఉండదని బాబు అన్నాడు. నేను తనతో, "ఆ కంపెనీలో జాయిన్ అవ్వద్దు. సాయిబాబా నీకు ఖచ్చితంగా మంచి ఉద్యోగం ఇస్తారు" అని అన్నాను. కానీ కోరుకున్న ఉద్యోగం రాక, చేతివరకు వచ్చి చేజారిపోతుండటం వల్ల తనెప్పుడూ నిరాశపడుతూ ఉండేవాడు. తను అలా నిరుత్సాహంగా ఉన్నప్పుడల్లా నేను తనతో అలాగే అనేదాన్ని. నేను ఎప్పుడు బాబాని బాబు ఉద్యోగ విషయంగా అడిగినా ఆయన నుండి సానుకూల సమాధానాలు వస్తుండేవి. నేను బాబుకి ఉద్యోగమొస్తే మొదటి నెల జీతం సాయినాథుని సమర్పించుకుంటానని అనుకున్నాను(అది బాబా పెట్టిన భిక్షే కదా! ఒక నెల జీతం ఆయనకి ఇవ్వడం గొప్పేమీ కాదు). తర్వాత ఒకరోజు బాబుకి 'ఒకతను నాకు పెద్ద మామిడి పళ్ళు ఇచ్చినట్లు, నేను వాటిని సాయితండ్రి కూర్చుని ఉన్నట్టు ఉన్న ఒక సంచిలో పెట్టినట్లు' కల వచ్చింది. మరుసటిరోజు బాబు నాకు ఆ కల గురించి చెపితే, నాకు చాలా సంతోషమేసింది. ఎందుకంటే, నేను మొదట నెల జీతం బాబాకు ఇస్తాననుకున్నాను కదా! అందుకే ఆయన ఉన్న సంచిలో పెట్టినట్లుగా కల వచ్చిందని నాకనిపించి బాబుతో, "సాయితండ్రి నీకు మంచి ఉద్యోగం ఉంచాడు. కాకపోతే సమయం రావాలి. అందుకే కొంచెం ఆలస్యం అవుతుంద"ని సాయిబాబాపై పూర్తి విశ్వాసంతో అనేదాన్ని. అదే నిజమై ఇప్పుడు మా బాబుకి పెద్ద కంపెనీలో ఉద్యోగం వచ్చింది. మొదట ఆ పెద్ద కంపెనీవాళ్ళు ఇంటర్వ్యూ చేసినప్పుడు అన్ని రౌండ్లలోనూ మా బాబుని సెలెక్ట్ చేసి, రెండు రోజుల్లో జాయిన్ అవ్వండి అని చెప్తే మేము చాలా సంతోషించాము. కానీ తర్వాత వాళ్ళు, 'ఇంకొంతమందిని ఇంటర్వ్యూ చేసి ఏ విషయమూ చెప్తామ'ని మెసేజ్ చేసారు. దాంతో మా బాబు చాలా అంటే చాలా కలత చెంది, "అమ్మా! ఎలా జరిగింది ఏంటమ్మా? నోటి వరకు పెట్టి ఇలా వెనక్కి లాగేసారేంటి?" అని చాలా బాధపడ్డాడు. నేను ఒకటే అన్నాను, "మనకు సాయిబాబా ఉన్నారు. అది నీకు సరైనది కాదేమో! అందుకే అలా చేయించారు. అది నీకు సరైనధైతే వాళ్లచేత రమ్మని చెప్పిస్తారు. ఇంకా కొంతమందిని ఇంటర్వ్యూ చేశాక చెబుతామన్నారంటే, నీ టాలెంట్ ఏమిటో వాళ్లకి తెలియజేయడానికి(అది కూడా బాబా పెట్టిన బిక్షే!) అయ్యుంటుంది. నువ్వేమీ టెన్షన్ పడకు. బాబా ఉన్నారు. ఖచ్చితంగా మంచే చేస్తారు. కొంత ఆలస్యం అయితే అవుతుంది కానీ, అది 'వీళ్ళు ఎంతవరకు నాపై విశ్వాసంతో ఉంటారో' అని మనల్ని పరీక్షించడానికే. అంతేగాని అన్యాయమైతేమటుకు జరగదు" అని ధైర్యం చెప్పాను. వారం తర్వాత కంపెనీనుండి 'ఫైనల్ ఇంటర్వ్యూ చేస్తామ'ని మెసేజ్ వచ్చింది. కానీ వాళ్ళు మొదట అలా చేసినందుకు మా బాబుకి ఆసక్తి పోయింది. నేను, మా పాప "మనమేమీ అడగలేదు. వాళ్లే మెసేజ్ పెట్టారు. నువ్వు ఇంటర్వ్యూకి హాజరవ్వు. అందులో సెలెక్ట్ అయినా నీకు ఇష్టమైతేనే జాయిన్ అవుదువు గాని" అని చెప్పాము. బాబు అలాగేనని ఇంటర్వ్యూకి వెళ్ళాడు. అందులో వాడు సెలెక్ట్ అయ్యాడు. కంపెనీవాళ్ళు మంచిగా మాట్లాడేసరికి బాబు ఆ కంపెనీలో జాయిన్ అయ్యాడు. సాయితండ్రి దయవల్ల అంతా బాగానే ఉంది. శిరిడీ వెళ్లి సాయితండ్రిని దర్శించుకుని మొదటి నెల జీతం సాయిబాబాకు సమర్పించాలని ఎదురుచూస్తున్నాను. "మీకు ఎన్ని కోట్ల ధన్యవాదాలు చెప్పినా తక్కువే తండ్రి. నువ్వు అండగా ఉండబట్టే ఈరోజు ఇలా ఉన్నాం. చల్లగా చూడు తండ్రి. పాప, బాబు ఉద్యోగ విషయంలో ఇంకొక కోరిక కోరాను కదా తండ్రీ. అది నెరవేటట్లు చేయండి తండ్రి".

సాయినాథ్ మహారాజ్ కీ జై.
Read More

సాయిభక్తుల అనుభవమాలిక 2070వ భాగం....

7 comments:
ఈ భాగంలో అనుభవాలు:

1. సాయి ఉంటే కానిది ఏమీ లేదు!
2. జ్యోతిర్లింగ దర్శనభాగ్యం ప్రసాదించిన బాబా
సాయి ఉంటే కానిది ఏమీ లేదు!
 
ఓంసాయి శ్రీసాయి జయజయసాయి. అందరికీ నమస్తే! నేను ఒక సాయి భక్తురాలిని. నేను ఇదివరకు ఆల్టెన్‌ కంపెనీలో పనిచేశాను. దురదృష్టవశాత్తు నేను ఆ కంపెనీలో చేరి 8 నెలలు కాకముందే నా క్లయింట్‌తో ప్రాజెక్ట్ కాంట్రాక్ట్ ముగిసింది. దాంతో నేను బెంచి మీద ఉండాల్సి వచ్చింది. చివరికి కంపెనీవాళ్ళు 3 నెలల నోటీసు పీరియడ్ ముగిసేలోపు వేరే ఉద్యోగం వెతుక్కోమని చెప్పారు. దాంతో నేను ఒకపక్క నా నైపుణ్యాన్ని మెరుగుపరుచుకుంటూ మరోపక్క ఉద్యోగాలకు దరఖాస్తు చేశాను. కానీ నాకు హెచ్ఆర్ కాల్స్ రాలేదు. అప్పుడు నేను సాయిబాబాను ప్రార్థించడం ప్రారంభించాను. తర్వాత బాబా దయతో నాకు ఇంటర్వ్యూ కాల్స్ రావడం మొదలై 2, 3 కంపెనీలకు ఎంపికయ్యాను. కానీ ఆఫర్ లెటర్ రాలేదు. నేను బాబాతోపాటు హనుమాన్‌ని కూడా ప్రార్థించాను. ఆ 2-3 కంపెనీలు ప్రతిస్పందించాయి. నేను తుది నిర్ణయం తీసుకొనే ముందు ఏ కంపెనీని ఎంచుకోవాలని సాయిని అడిగి సాయి సూచననుసరించి 'బిగ్ 4' కంపెనీలో చేరి మంచి గుర్తింపు పొందాను. గతంలో సాయి ఆల్టెన్‌ కంపెనీ ఎంచుకోవద్దని సూచించినప్పటికీ నేను ఆ కంపెనీలో చేరి సాయి మాట వినకపోవడం వల్ల కొన్ని నెలల్లోనే ఉద్యోగం వెతుక్కోవాల్సి వచ్చింది. అది అర్థమయ్యాక నాకు సాయిపై నమ్మకం పెరిగి ఇంకెప్పుడూ సాయి వద్దని పని చేయకూడదని నిశ్చయించుకున్నాను. నన్ను క్షమించి అన్ని ఇబ్బందులలో సహాయాన్ని, బలాన్ని ఇస్తున్న సాయికి ధన్యవాదాలు.

ఇప్పుడు మా అమ్మ అనుభవాలు ఆమె మాటల్లోనే చదవండి. అందరికీ నమస్కారాలు. నేను ఒక సాయి భక్తురాలిని. నాకు పెళ్ళై 26 సంవత్సరాలైన మాకు సొంతిల్లు లేదు. మాకు ఒక స్థలం ఉంది. దాంట్లో ఇల్లు కట్టాలని మావారు అనేవారు. కానీ ఆ స్థలంకి లోన్ రాదు, మొత్తం డబ్బులు పెట్టి కట్టే స్తోమత లేదు. అందుచేత ఫ్లాట్ తీసుకోవాలని ఉండేది. కానీ మావారికి ఫ్లాట్స్ ఇష్టముండేది కాదు. నేను సాయిని, ఇంకా దేవుళ్లందరినీ, "మాకు ఇంతవరకు సొంతిల్లు లేదు. మాకు ఒక ఇల్లు ప్రసాదించండి" అని వేడుకుంటూ ఉండేదాన్ని. ఇలా ఉండగా 2024, నవంబరులో మావారు మాకున్న లారీ అమ్మేశారు. ఆ డబ్బులు వచ్చాక నేను మావారు ఆ డబ్బు దేంట్లో పెట్టుబడి పెడతారో  అని భయపడి, "సాయీ! ఆ డబ్బు దుర్వినియోగం కాకుండా చూడు తండ్రీ" అని వేడుకున్నాను. సాయి దయ చూపారు. అప్పటివరకు ప్లాట్స్ అంటే ఇష్టపడని మావారు ఒక ప్లాట్ చూడడం, అది నచ్చడం, తన దగ్గరున్న డబ్బు నుండి కొంత అడ్వాన్స్ కట్టడం జరిగిపోయాయి. 15 రోజుల్లో లోన్ కూడా ఎటువంటి ఇబ్బంది లేకుండా శాంక్షన్ అయి 2025, జనవరి 10వ తారీఖు కల్లా రిజిస్ట్రేషన్ కూడా అయింది. సాయి ఉంటే కానిది ఏమీ లేదు.

2025, ఫిబ్రవరి 9న మా అమ్మ చనిపోయింది. ఆ సమయంలో మావారు ఊర్లో లేరు. కొన్ని కారణాల వల్ల రాలేదు. ఆ విషయమై నేను, మా పిల్లలు, మా పుట్టింటివాళ్ళు అందరం చాలా బాధపడ్డాం. నా అన్నదమ్ములు మీ కార్యక్రమాలకు మేము రామన్నారు. నేను, "ఏమి చేయగలను సాయి?" అని సాయితో అనుకున్నాను. సరిగ్గా నాలుగు నెలల తర్వాత మే 9న మేము మా ఇంటి గృహప్రవేశం పెట్టుకున్నాము. అప్పుడు, "గృహప్రవేశానికి మా పుట్టింటి తరఫువాళ్ళు రాకపోతే ఎలా తండ్రీ? ఎటువంటి గొడవలు, ఆటంకాలు లేకుండా కార్యక్రమం సక్రమంగా జరిగేలా చేయండి" అని సాయిని ప్రార్థించాను. సాయి దయవల్ల నా అన్నదమ్ములు గృహప్రవేశానికి వచ్చారు. అసలు రామన్నవాళ్ళు రావడమే కాకుండా ఇంటి పనులు దగ్గరుండి చేయించి మొత్తం కార్యక్రమమంతా జరిపించారు. ఇది సాయి కృపాకటాక్షం. "ధన్యవాదాలు సాయి".
Read More

సాయిభక్తుల అనుభవమాలిక 2069వ భాగం....

8 comments:
ఈ భాగంలో అనుభవాలు:

1. బాబా లీలలు అర్థం కావు!
2. మధుర జ్ఞాపకాలు కోల్పోకుండా కాపాడిన బాబా
Read More

సాయిభక్తుల అనుభవమాలిక 2068వ భాగం....

8 comments:
ఈ భాగంలో అనుభవాలు:

1. స్వప్నానుభవం ద్వారా కర్మను కరిగించిన బాబా
2. బాబా అనుగ్రహం
బాబా అనుగ్రహం

నా పేరు హాసిని. ఒకరోజు నేను జలుబు, తీవ్రమైన కడుపు నొప్పితో బాధపడ్డాను. సాయి భక్తులకు ఏదైనా కష్టం వస్తే, ఏం చేస్తారు? బాబా ఊదీ నీళ్లలో కలిపి తాగుతారు. నేనూ అలానే చేసాను. బాబా దయవల్ల నాకు ఆ రెండు సమస్యల నుండి ఉపశమనం లభించింది.

నా పరీక్షల సమయంలో ఒకరోజు హఠాత్తుగా జివిఎంసి వాళ్ళు మా తాతయ్య షాప్ తొలగిస్తామని అన్నారు. అది తెలిసి నాకు భయం మొదలై, "తాతయ్య షాప్ సురక్షితంగా ఉంటే గారెలు నైవేద్యంగా పెడతాన"ని బాబాతో చెప్పుకున్నాను. అద్భుతం ఏంటంటే, జేసీబీ డ్రైవర్ మాకు తెలియనప్పటికీ అతను మమ్మల్ని మా ప్రాంతంలో చూశానని మా షాపుకి ఏమీ కాకుండా చూసారు. మిగతా షాపులన్నీ తొలగించారు. అలా బాబా అతని రూపంలో మాకు నష్టం జరగకుండా కాపాడారు. ఇది నిజంగా సాయి లీల. "ధన్యవాదాలు బాబా".

నాకు ఇష్టమైన అబ్బాయికి పెళ్లి చేస్తామని వాళ్ళింట్లో బలవంతం చేసారు. అప్పుడు నేను, "బాబా! తను పండక్కి వాళ్ళింటికి వెళ్ళినప్పుడు ఎలాంటి పెళ్లి ప్రస్తావన రాకూడదు" అని బాబాని అర్థించాను. బాబా దయవల్ల పెళ్లి గురించి వాళ్ళు ప్రస్తావించలేదు. "ధన్యవాదాలు బాబా. మా ఇద్దరి పెళ్ళికి మీరు అనుమతి ఇచ్చారు. దయచేసి ఎలాంటి గొడవలూ లేకుండా మా ఇద్దరికీ పెళ్లి అయ్యేలా ఆశీర్వదించండి బాబా".  

2025, ఆగష్టులో నా బెస్ట్ ఫ్రెండ్ పెళ్లి జరిగింది. తను తన పెళ్ళిక రాకపోతే నాతో మాట్లాడానని అంది. పెళ్లికి ముందు నాకు జ్వరం వచ్చినప్పటికీ సరిగ్గా పెళ్లి సమయానికి తగ్గింది. కానీ నెలసరి రాలేదు.పెళ్ళిలో ఎక్కడ వస్తుందో అని భయపడి బాబా ఊదీ తీసుకొని ఆయన సహాయాన్ని అర్థించాను. బాబా దయవల్ల నాకు ఎలాంటి ఆటంకం రాలేదు. నా ఫ్రండ్ పెళ్లిలో ఆనందంగా గడిపాను. అలానే రాఖీ పౌర్ణమికి కూడా నెలసరి ఆటంకం రాకూడదని బాబా సహాయం అడిగాను. బాబా దయవల్ల అప్పుడు కూడా నెలసరి రాలేదు. ఇంకో విషయం ఫ్రెండ్ పెళ్ళికి తయారవుతున్నప్పుడు నా వెండి చైన్ కనిపించకపోతే, కొబ్బరికాయ కొడతానని బాబాకి మొక్కుకున్నంతనే కనిపించింది. "చాలా చాలా ధన్యవాదాలు బాబా".
Read More

సాయిభక్తుల అనుభవమాలిక 2067వ భాగం....

7 comments:
ఈ భాగంలో అనుభవాలు:

1. సాయినాథుని ఊదీ సంజీవని
2. బాబా చేసిన మేలు
సాయినాథుని ఊదీ సంజీవని

పిలిచినంతనే పలికే దైవం, అఖిలాండకోటి బ్రహ్మాండనాయకుడైన శ్రీసాయినాథునికి ప్రణామాలు. నా పేరు జ్యోతి. ఈ బ్లాగు సాయి భక్తులకు నిజంగా ఒక వరం. ఎంతోమంది సాయిభక్తుల అనుభవాలను ఈ బ్లాగులో చదువుతున్నప్పుడు చాలా చాలా సంతోషంగా అనిపిస్తుంది. సాయితండ్రి నా జీవితంలో ఎన్నో అద్భుతాలు చేశారు. వాటిలో నుండి కొన్ని ఇప్పుడు మీతో పంచుకుంటున్నాను. ఒకసారి ఊరిలో ఉన్న మా ఇంటిని శుభ్రం చేయించాలని పనివాళ్ళని రమ్మని చెప్పాను. నేను వెళ్లి వాళ్ళచేత శుభ్రం చేయించాలి. నాకు కూడా చాలా పని ఉంటుంది. అయితే ఆరోజు ఉదయం నిద్రలేచేసరికి నాకు చాలా నీరసంగా ఉండి అస్సలు లేచే ఓపిక లేకుండా పోయింది. అక్కడ చూస్తే, అప్పటికే పనివాళ్ళు వచ్చేసారు. నేనున్న స్థితిలో మేమున్న ఊరి నుంచి ఆ ఊరికి ప్రయాణం చేయాలంటే చాలా భయమేసింది. అయినా సాయినాథుని మీద భారమేసి కొద్దిగా ఊదీ నుదిటికి పెట్టుకొని, మరికొంత ఊదీ నీటిలో కలుపుకొని తాగి, "సహాయం చేయమ"ని బాబాను ప్రార్థించి బయలుదేరాను. అలా వెళ్లిన నేను ఆ రోజంతా దుమ్ము, ధూళిలో ఎంతో కష్టపడి చాలా పని చేశాను. అంత పని చేసినా సాయంత్రం వరకు ఎటువంటి అలసట తెలియలేదు. ఇంటికొచ్చాక కానీ ఉదయం నా పరిస్థితి నాకు గుర్తు రాలేదు. అంత ఓపిక, శక్తి ఎక్కడినుండి వచ్చాయో అనిపించింది. ఎక్కడినుండి ఏముంది? ఆ సాయినాథుడే లేచి నిలబడలేనంత నీరసంగా ఉన్న నాకు ఎంత పని చేసినా అలసిపోనంత శక్తిని తమ ఊదీతో ఇచ్చారు. కొన్నిసార్లు మన ఒంట్లో అస్సలు బాగాలేనప్పుడు చాలా పెద్ద పనులు చేయాల్సి వస్తుంది. అలాంటప్పుడు అంత త్వరగా ఆహారం ఇవ్వలేని శక్తిని మన తండ్రి సాయినాథుడు ఇవ్వగలరు. ఆయన ఊదీ పరమ ఔషధంగా అనంతమైన శక్తిని ఇవ్వగలదు.

ఇంకోసారి హఠాత్తుగా నా నడుము పట్టేసింది. నొప్పి చాలా ఎక్కువైపోయి మందులు వేసుకున్నా తగ్గలేదు. ఏ పనీ కాదు కదా నా పనులు కూడా చేసుకోలేకపోయాను. నిలబడలేకపోయాను, కూర్చోలేకపోయాను. పడుకున్నా భయంకరమైన నొప్పితో విలవిలలాడిపోయాను. నాకు చాలా భయమేసింది. డాక్టర్ దగ్గరకి వెళ్తే ఏ స్కానింగ్లో, సర్జరీలో అంటారని భయమేసింది. అది అంతటి భయంకరమైన నొప్పి. ఆ నొప్పితో నాలుగు రోజులు ఇబ్బందిపడిన తర్వాత నాకెందుకో 'బాబా ఊదీ రాసుకొని ఉండొచ్చు కదా!' అనిపించింది. అప్పటివరకు బాబాని "నొప్పి తగ్గించమ"ని వేడుకుంటున్నా బాబా ఊదీని ఉపయోగించాలని గుర్తు రాలేదు. ఇక వెంటనే బాబా ఊదీ నీటిలో కలిపి నొప్పి ఉన్నచోట రాశాను. అంతే! ఇంకా సాయితండ్రి అద్భుతం చూడండి. అరగంటలో నొప్పి చాలావరకు తగ్గిపోయింది. అస్సలు కదలలేకపోయినా నేను అరగంట తర్వాత ఇంటి పనులు మామూలుగా చేసుకున్నాను. ఇలా ఎన్నోసార్లు సాయినాథుడు నన్ను రక్షించారు.  ఎప్పుడు, ఎక్కడ నొప్పి వచ్చినా, ఎవరికైనా అనారోగ్యంగా ఉన్నా ఆ సాయినాథుని ఊదీ సంజీవని. సాయినాథుని దయతో మరిన్ని అనుభవాలను త్వరలోనే మీతో పంచుకుంటాను. సాయితండ్రికి నా హృదయపూర్వక కృతజ్ఞతా ప్రణామములు.
బాబా చేసిన మేలు

ఓంసాయి శ్రీసాయి జయజయసాయి. నా పేరు లలిత. ఒకసారి మా చిన్న పాపకి కడుపులో నొప్పి బాగా వచ్చింది. టాబ్లెట్లు వాడినా నొప్పి తగ్గలేదు. అప్పుడు నేను బాబాకి దణ్ణం పెట్టుకొని పాప నుదిటికి కొంచెం ఊదీ పెట్టి, మరి కొంచెం ఊదీ నోటిలో వేసాను. తర్వాత కొద్దిసేపటికి పాప నొప్పి తగ్గింది. నాకు చాలా ఆనందమేసి సాయికి కృతజ్ఞతలు చెప్పుకున్నాను.

ఇంకోసారి మా బావగారికి హార్ట్ స్ట్రోక్ వచ్చింది. 'హార్ట్‌లో రెండు బ్లాకులు ఉన్నాయని, స్టంట్లు వేయాలని' డాక్టర్ చెప్పారు. నేను చాలా టెన్షన్ పడి బాబాకి దణ్ణం పెట్టుకొని ఆ ఆపరేషన్ సక్సెస్ అవ్వాలని అనుకున్నాను. బాబా దయవల్ల రెండు స్టంట్లు వేశారు. అతను క్షేమంగా ఇంటికి వచ్చారు. నేను ప్రతి సంవత్సరం కనుమ పండక్కి నా కన్నవారి ఇంటికి వెళ్తాను. అలాగే ఈ సంవత్సరం(2026) వెళ్ళాలనుకున్నాను. కానీ ఈసారి సరిగా ఆ సమయానికి నా తోడికోడలు బయట వుంది. బావ గారు పేషెంట్. అతనిని, అలాగే కొద్దిరోజుల ముందే పుట్టిన వాళ్ళ మనవరాలిని వదిలేసి ఎలా వెళ్లడమని కనుమ రోజు వెళ్లలేదు. తర్వాత వెళదామంటే పిల్లలకి కాలేజీలు ఉంటాయి. అందుకని బాబాని గుర్తు చేసుకొని, "బాబా! నేను ఎలా అయినా కన్నవారి ఇంటికి వెళ్ళేలా చేయండి" అని దణ్ణం పెట్టుకున్నాను. బాబా దయవలన నా తోడుకోడలు ఇంట్లోకి వచ్చాక తను పిల్లల్ని చూసుకుంటానన్నది, ఇంట్లో అందరూ నేను వెళ్ళడానికి ఒప్పుకున్నారు. "చాలా చాలా ధన్యవాదాలు బాబా. మీ మేలు ఈ జన్మలో నేను మర్చిపోలేను. ఎప్పుడూ మమ్మల్ని ఇలాగే కాపాడుతూ ఉండండి. మీ పాదాలందు స్థిరమైన నమ్మకం, భక్తి, శ్రద్ధలు కలిగి ఉండేటట్లు నన్ను ఆశీర్వదించండి బాబా".
Read More

సాయి మహారాజ్ సన్నిధి సోషల్ మీడియా లింక్స్:

సాయి మహారాజ్ సన్నిధి సోషల్ మీడియా లింక్స్:

Subscribe Here

బ్లాగ్ అప్డేట్ నోటిఫికేషన్స్ నేరుగా మీ మెయిల్ కే వచ్చేందుకు క్రింద బాక్సులో మీ మెయిల్ ఐడి టైపు చేసి subscribe పై క్లిక్ చేసి, తరువాత స్టెప్స్ పూర్తీ చేయండి.

Delivered by FeedBurner

Followers

Recent Posts


Blog Logo